7th lang na JLH dakkasu jawngma ni a sharin hpawng hte hkrumzup bawngban hpawng galaw
7th lang na JLH ( Jinghpaw Wunpawng Laili Laika hte Htunghkring Hpung ) dakasu jawngma ni a sharin hpawng hte hkrumzup bawngban hpawng hpe Monyin hka lup hpung nawku jawng wang kaw June shata praw 4 ya shani kaw nna June shata 9 ya shani du hkra galaw na re lam chye lu ai.
“Ndai zuphpawng gaw JLH ginjaw kaw nna woi awn galaw nga ai dakkasu ginra shagu na magam bungli ni hkrumzup bawngban ai hpawng re. JLH ginjaw kaw nna laning mi hta 2 lang woi awn galaw ai hte bawngban ai lam ni gaw shawng lam hta matut galaw sawa na lam hte JLH ramma ni hku nna myusha lam yan hta gara hku shang lawm sa wa na lam ni hpe madung dat nna galaw ai lam re” nga nna JLH Mu Na Kyit Hkai lit hkam Lagya Gyung Hawng tsun dan ai.
Lak jet hku sharin ya na sara ni gaw, Jinghpaw Wunpawng Ginru Ginsa Labau hpe Rev. Marip Bawk San sharin ya na, Tara Masa ( Rule Of Law ) hpe Sara Aung Zaw Latt sharin ya nna, Sut Masa hte seng ai lam hpe Sut Du Yawba ni hku nna sharin ya na re lam chye lu ai.
Hkrumzup bawngban hpawng hta JLH kaw shang lawm ai Monyin, Myitkyina, Manmaw,Yangon, Mandalay, Sagaing, Taunggyi, lashio hte Naypyitaw ginra shara shagu hkan na lit nga ai dakkasu jawngma ni sadu shang lawm ai lam chye lu ai.
