9th lang na KBC La Ningbaw Ningla sharin hpawng hpe zoom online hku nna galaw na
KBC La Magam Dap kaw nna woi awn galaw ai (9) lang na La Ningbaw Ningla sharin hpawng hpe Uru Seng Maw Ginwang de galaw na matu hkyen lajang da ai raitim, COVID-19 ana zinli a majaw Zoom online hku nna October shata 15 ya jahpawt hkying 9:45am aten kaw nna shana daw hkying 3:00pm aten laman galaw na matu hkyen lajang nga ai lam na chye lu ai.
Sharin hpawng hta Jan Mai Buga Hpung kaw na Rev. Lahpai Ja Naw kaw nna Hkamja zet let ai lam woi kaja ngu ai ga baw hte sharin ya na rai nna, KBC Amu Madu Rev. Hpauyawng Tu Mai kaw nna Hkristu a lanang hkap lu hkra myit hkrum let gawgap ga ngu ai sharin ga baw hte sharin sa wa na re lam chye lu ai.
Sharin hpawng hta Ginwang La Hpu-awn La Komiti ni hte KBC La Magam Dap magam gun ni shang lawm sharin hkamla na rai nna, KBC hpung shawa yawng madat n-gun jaw sharin hkamla lu na matu KBC Mu Na Online kaw nna Live madun ya na re lam, KBC Muna Kyithkai Hpu-awn Rev. Maran Naw Di Awng tsun ai.
“La Magam Dap kaw nna grai hkyen da ai raitim, Corona Virus a majaw masha nmai hpawng chyawm ai re majaw, seng ang ai ningbaw ningla ni hpe online kaw nna sharin ya ai lam sha re, internet line hkrak taw jang Live hpe atsawm sha yawng lu madat lu yu na matu hkyen lajang da ai” nga nna tsun dan ai.
KBC La Ningbaw Ningla sharin hpawng hpe laiwa sai shaning hta hpung shawa law law hte wu wu di di galaw la lu sai raitim, daining gaw COVID-19 ana zinli a majaw, Ginwang kata na ahkyak ai La Hpu-awn La Komiti ni hte sha Zoom online hku nna galaw sa wa ai re lam chye lu ai.
Photo Credit; Mgz Mu Na Kyithkai
