ABSDF rawt malan ai 34 ning hpring masat hpawng galaw

All Burma Students Democratic Front (ABSDF), laknak lang rawt malan ai 34 ning hpring masat dingsat hpawng lamang hpe August shata praw 8 ya shani hkying 10:00am aten ေဒါင္းစစ္သည္ gawknu hta galaw ai lam chye lu ai.

1988 September shata 19 ya shani Myen mung ting hpe Myen hpyen dap ni hku nna, daru magam ahkang aya yawng zing madu la kau ai kawn mungdan ting ninghkap kasu kabrawng wa ai hpe Myen hpyen dap hku nna mungchying mungshawa ni hpe gap sat wa re kawn, 1988.8.8 Jawngma Dap ABSDF paw pru wa ai re.

Ya na zawn masat nhtoi galaw ai a yaw shada lam hpe Myenmung Dingdung Daw ABSDF Amu Madu Dukaba Lashi Yaw Shu tsun ai hta “Hpyen gumshem ni hpe anhte gasat mat wa ai shaloi anhte hkrai gasat na nmai ai, ndai gaw mungdan ting hte seng ai magam lit re labau lit re majaw gaw, anhte galaw lai wa sai lam mung mungdan a matu re majaw, anhte a kanau ni ramma ni hpe hpa majaw ndai 8888 byin wa ai, hpa lachyum re ngu hpe dum na matu ndai labau hpe chye na matu ndai masat dingsat hpe galaw wa ai re” nga tsun ai.

“Anhte Myen hpyen gumshem hpe ya du hkra asum njaw shi ai, 34 ning rai sai, matut nna naw gasat na re anhte ndang yang ya na ma ni hpe shalat shaprat taw nga ai, anhte a lahpa galai la na matu shanhte mung jin jin re, 8 ေလးလုံး masat dingsat nhtoi galaw na matu, mi na ni hkrai, anhte hkrai tsun taw nga ai nre sha dap shawa yawng kaw masha lata nna, 8 ေလးလုံး hte seng nna ga shaga shingjawng poi hpe bat mi jan galaw na masha lata la let, ndai hpawng hta mungga shaga na ahkang jaw ai lam ni galaw ai re” nga nna Amu Madu matut tsun ai.

Masat hpawng hta KIA kaw na salang ni, CDM sara, sarawun ni, mung mare masha ni hte dap shawa masha yawng marai 200 jan sa du shang lawm ai lam chye lu ai.