Adup sat hkrum ai Jan Nhkum Nang Htang hpe Namhpakka dum nta kaw makoi mayang akyu hpyi hpawng galaw
Mungmyit Sinli Ga ( Kachin Sub-state ) Kutkai Ginwang, Namhpakka Ginwang Daw, Nam Sung mare hta July shata praw 3 ya shana adup sat hkrum ai Jan. Nhkum Nang Htang hpe Namhpakka shannu wa ni a dum nta kaw July shata praw 6 ya jahpawt hkying 9:00am aten hta makoi mayang akyu hpyi hpawng galaw ai lam chye lu ai.
Adup sat hkrum ai Jan Nhkum Nang Htang a moimang hpe July praw 3 ya shana jang Lashio tsi rung de htaw yu wa nna, ga gadoi tsi sarawun ni jep jen yu ai shaloi, shi a baw kaw adup da hkang hkang ai, nhka ayai ai, yu hkraw daw mat ai, pu, shatkan ni amang rai taw ai, mazut roi rip ai lam nga nnga gaw bat 2 rai jang she mahtai chye na re ngu, tsi sarawun ni tsun ai lam Ramma langai tsun dan ai.
Si mat ai mabyin hte seng nna Ramma wa matut tsun ai hta July praw 4 ya jahpawt hkying 6:30pm daram hta htingbu jan langai gaw gat rai la na matu wa shaga tim nhtan, shi manang jan Ja Nan shaga tim nhtan akyu hpyi taw shadu ai, Miwa la mung gat rai la na matu sa wa ai dai kaw Myen hpyenla marai 2 mung Ah Shawng nga shaga tim nhtan ai majaw hpyenla wa gaw hkinchyi hku kaw na yu dat yang n ga de taw taw ai mu ai lam tsun ai.
Jan Nhkum Nang Htang gaw shi manang jan Ja Nan hte gat rau dut ai re. Ja Nan gaw shi a jinghku ni Namhpakka de wa mat ai majaw shana rai jang nta sa sin yup ai rai nna, Dai shana marang mung grai htu ai Myen hpyenla marai 2 mung Miwa kaba ( တရုတ္ ၾကီးအိမ္ ) ni a nta gara kaw rai nga sa san ai lam mung chye lu ai.
Jan Nhkum Nang Htang gaw gumhpraw ayoi ni mung galai ya ai lam nga ai. Sat hkrum ai hpang jahpawt Myen hpyenla langai gaw laga gat seng kaw ayoi gun li ai ngu na sa galai ai dai gumhpraw gaw Nhkum Nang Htang galai tawn ai gumhpaw ayoi ni re lam, buga masha ni tsun nga ma ai re.
Nam Sung mare gaw lai wa sai aten hta dum nta htinggaw 70 daram nga ai rai nna majan a majaw mungshawa nkau hpyen koi yen mat nhtawm ya gaw nta htinggaw 20 daram sha nga ai re hte 2016 ning kaw nna Myen hpyen dap Hk.L.Y 261 ni Nam Sung mare kaw nga hpang wa ai lam chye lu ai.
N nga mat sai jan Nhkum Nang Htang gaw kasha marai 2 lu ai re. Madu wa hte kasha yan gaw Huhpyet mare kaw wa nga ai, kasha kaba ai wa gaw jawng tsang 7, kaji ai wa gaw tsang 5 lung taw ai. Shi a ningrum ningtau wa Salang Tu Bu gaw lai wa sai 6 ning daram hta cycle accident byin nna baw kaw loi hkra mat ai majaw bawnu nau nkring mat ai. Kasha yan hpe jawng htawk let Nam Sung mare kaw gat dut let nga nga ai aten hta ya na zawn mara nnga ai adup sat hkrum ai re lam, Namhpakka mare na Salang langai tsun dan ai.
Ndai amu hte seng nna dum nta masha ni gaw tengman tara rap ra ai mahtai hpe lu la na matu, ra sharawng nga ai re hte ndai amu hpe Mungmyit Sinli Htunghking Hpung ni, Shinggyim ahkaw ahkang hte seng ai ni hte Amyu Shayi Hpung lit la garum sa wa na re lam chye lu ai.
