Aerobic ka hkrang hte amyu bawsang ni a buhpun sumraw hking shingjawng lamang galaw
Manje Ninghtawn lutdaw kasa ninggang gashun ginsup ga baw npu hta Aerobic ka hkrang hte amyusha bawsang ni a buhpun sumraw hking shingjawng ai lamang hpe kapyawn nna Manje Muklum Gawknu kaw Myen asuya ni woi awn nhtawm, December shata praw 10 ya jahpawt hkying 9:30am aten kaw nna shana daw hkying 3:00pm aten du hkra galaw ai lam chye lu ai.
Aerobic ka shing jawng ai hta No.I kumhpa hpe Kawng Ra lapran tsang jawng ni No.II kumhpa hpe Manje lahta tsang jawng ni No.III kumhpa hpe Manta lahta tsang jawng ni lu mat ai re. Aerobic ka shing jawng ai gaw Manje Ninghtawn kata na laika sharin jawng 15 na jawngma ni re.
Buhpun sumraw hking hta Jinghpaw Wunpawng Amyusha bawsang 7 a buhpun hkying, Sam (ရွမ္းၾကီး) Amyusha hking, Sam Hkyeng Amyusha hking hte Myen Amyusha hking ni re ai.
Shing jawng ai hta Manje ninghtawn kata na mare lawk hte laika sharin jawng na jawngma num sha ni yawng marai 32 shingjawng ai re. Shing jawng ai hta na marai 6 hpe lata la ai, dai marai kru kaw na No.I lu ai gaw, Shayi Wahpai Bawk Nan nshang masat 17 Nung Lungmi hking, No.II gaw Shayi Nhkum Ja Ing Raw nshang masat 31 Myen hking rai nna, No.III gaw Shayi Gareng Ji Ngai nshang masat 22 Rawang hking ni lu mat ai.
Nambat langai kumhpa hpe kyats 200,000 (Sen Lahkawng), nambat lahkawng kumhpa kyats 150,000 (Sen Mi Mun Manga), nambat masum kumhpa gaw 100,000 (Sen Mi), ngam ai marai 3 hpe 50,000 (Mun Manga) hpra jaw nna, kaga ni hpe gaw shang lawm kumhpa kyats 10,000 (Mun Mi) hpra jaw ai lam chye lu ai.
Shing jawng ai lamang hta Aerobic ka hkrang hta mung Kawng Ra lapran tsang jawng ni No.I lu ai bai nna amyusha bawsang hking sumraw shingjawng ai hta mung nambat langai hte nambat masum hpe Kawng Ra lapran tsang jawng ni lu mat ai rai nna, nambat lahkawng hpe gaw Munghkawng lahta tsang jawng ni lu mat ai re.
“Ya na zawn amyusha bawsang ni a buhpun sumraw hking hte shingjawng ai lamang gaw, Manje ninghtawn kata hta shawng ningnan lang galaw ai re” nga nna Manje Muklum na Salang langai tsun dan ai.
Hpawng lamang hta Manje Ninghtawn kata Lutdaw Salang U Min Min hte asuya rung shagu na lit nga ai Salang ni, Jinghpaw Wunpawng Htunghking Hpung na Salang ni, mare lawk kata na lit nga ai Salang ni, jawng sara/num ni hte jawngma ni yawng marai 200 daram sa yu n gun jaw ai lam chye lu ai.
Photo credit; Shagawng Zau
