Alaw Bum makau kaw gasat gala majan matut byin

Ginjaw ginra, Alaw Bum makau kaw, April shata 13 ya jahpawt hkying 8:30am aten kaw nna KIA hte Myen Hpyen Dap, Hk.L.Y 47, Hk.M.Y 387, 437, 438 hte 320 dap na pawng hpawng hpyen hpung ni hte gasat gala majan matut byin ai lam chye lu ai.

Gasat gala majan byin nga ai Alaw Bum grup yin shara ni hta Myen hpyen ni jahpawt hkying 4:48am aten hta Jet fighter langai hte bawm kalang wa jahkrat kau da ai hpang numdaw 2 lang ngu na hkying 11:53am aten hta Jet fighter lahkawng hte bawm jahkrat, wa gap kau da ai re.

April shata 13 ya shana hta sha, hkying 9:53pm aten hta Sama kaw shara jahkrat nga ai Myen hpyen ni gaw, KIA Masat (1) Dap Nawng Daju, Hpalap Bum maga de laknak kaba 120mm hte 2 lang gap bun ai, dai hpang Shanghkawng Bum kaw shara jahkrat nga ai, Myen hpyen ni mung KIA ni shara jahkrat nga ai, Lung Rawk Post maga de sinat kaba 60mm, 81mm ni hte gap bun ai. Dai hpang KIA maga na mung laknak kaba hte bai nhtang gap bun ai lam chye lu ai.

Dai ni April shata 14 ya jahpawt hkying 10:30am aten hta mung Alaw Bum grup yin kaw Myen hpyen ni Jet fighter langai hte bawm wa jahkrat bun ai lam chye lu ai.