Alaw Bum makau kaw KIA hte Myen hpyen dap ni laja lana gasat poi byin nga
Ginjaw ginra, KIA Masat (5) Dap Ba, Masat (30) Dap Dung ginra Alaw Bum makau kaw, April shata 12 ya jahpawt 5:00am aten kaw nna KIA hte Myen hpyen dap ni laja lana gasat gala majan byin nga ai lam chye lu ai.
Jahpawt hkying 7:00am hte hkying 7:10am aten laman majan byin nga ai ten, Myen hpyen ni Jet nbungli lahkawng hte Alaw Bum kaw bawm wa jahkrat, wa gap bun ai. Dai hpang hkying 11:00am aten hta numdaw masum lang, shani ka-ang hkying 12:25pm aten numdaw mali lang, hkying 12:35pm aten hta numdaw manga lang wa gap bun sai, ya gaw lahkawng maga na laknak kaba ni hte gap bun hkat nga ai lam, shawng lam na Salang langai tsun dan ai.
Manmaw yu wa ai lam Myotit mahkrai pawt kaw dap jung nga ai Balik dap hte Salawng kawng kaw dap jung nga ai Myen dap ni hpe April shata 11 ya shana hkying 11:00pm aten kawn April shata 12 ya jahpwt hkying 1:25am aten laman hta KIA hpyen hpung ni kaw nna sa htim gap gasat ai re lam, shawng lam na Salang langai tsun dan ai.
Manmaw deng masum kaw dap jung nga ai Myen hpyen myawk dap ni mung gasat poi byin ai shara de sinat kaba hte dai hpawt hkying 2:00am aten kaw nna gap sharu bun nga ai majaw, Manmaw grup yin hkan na mare masha ni hkrit kajawng nga ai lam, ginra shisawk ni shana wa ai kaw na chye lu ai.
Alaw Bum Myen hpyen dap hpe lai wa sai March shata 25 ya shani KIA ni htim gasat zing madu da ai hpang, April shata 11 ya shani kaw nna Myen hpyen dap ni hpyen man lahkawng hte htu shadut gasat lung wa ai sha n ga laknak kaba, Jet nbungli ni hte wa htim gap ai majaw, laja lana gasat gala majan bai byin nga ai re hpe chye lu ai.
