Alen Bum Hpaji Jawng (10) ning hpring, gam chyam lamang galaw
Wunpawgn Mungdan Shanglawt Asuya, Alen Bum Hpaji Jawng (10) ning hpring, gam chyam lamang hpe October shata praw 8 ya shani hta Alen Bum Hpaji Jawng Gawknu kaw galaw ai lam chye lu ai.
Gam chyam lamang galaw ai a yaw shada lam hpe Alen Bum Jawng Up Sara Kaba Maru Hkawng Lum ndai zawn tsun ai.
“Alen Bum Hpaji Jawng hpaw ai (10) ning hpring ai lami laman langai hku la nna, lai wa sai (10) ning tup hta garum madi shadaw lai wa ai garum ningtum hpung ni, magam dap kanu kawa ni, magam dap hpa-awn ni hte apnawng lai wa sai sara/num ni yawng hpe chyeju dum ai hku nna, (10) ning hpring masat kumhpa, gam chyam lamang hku nna galaw ai re”
Gam chyam lamang galaw ai hta manu dan ai arung arai law law galaw da ai re. Ndai gam chyam lakmat hpe shinggan de mung dut ya ai lam nga ai hta kumhpa kaba rai nga ai mawdaw hpe gaw, Alen Bum Hpaji Jawng hta Tsang (10) hpaji hpe sharin hkamla nga ai shayi Maran Ja Seng Mai hkam la lu sai re hpe chye lu ai.
Alen Bum Hpaji Jawng hpe lai wa sai 2013 ning kaw nna, hpaw hpang wa ai rai nhtawm, ya na zawn gam chyam lamang galaw ai gaw, shawng ningnan lang rai nga ai. 2023-2024 ning hpaji ladaw hta Tsang (9) hte Tsang (10) jawngma ni yawng marai (2000) jan hpaji sharin hkam la nga ai re.
Gam chyam lamang galaw ai hta saw shaga da ai Makan Dap, Magam Dap na myitsu salang ni, hpung woi sara ni, jawngma kanu kawa ni hte jawngma ni hte rau a ngwi a pyaw sha galaw la lu sai lam chye lu ai.
