Alen Bum Hpaji Jawng hte Laiza Lahta Tsang Jawng ni hta jawng mying hkapla na matu hkyen shajin nga
Wunpawng Mungdan Shanglawt Asuya kaw nna hpaw sharin ai Alen Bum Hpaji Jawng hte Laiza Lahta Tsang Hpaji Jawng ni hta jawnglung na jawngma ni a mying jahpan hpe June shata 23, 24 ya shani kaw nna June shata htum du hkra hkap la sa wa na re lam chye lu ai.
Jawng mying hkapla ai lam hpe Ginjaw Hpaji Dap a ahkang jaw ai kata kaw hkapla sa wa ai lam rai nna, jawng hpaw sharin sa wa na lam hte seng nna mung, Ginjaw Hpaji Dap a matsun kata kaw galaw sa wa na re lam, Laiza Lahta Tsang Jawng Up, Saranum Kaba Ja Mai tsun ai kaw na chye lu ai.
Jawng mying sa bang ai shaloi hkan sa ra na lam ni gaw, jawng mying hkapla ai Sara/num ni hte jawng mying sa bang ai jawngma, kanu kawa ni yawng n-gup magap (Mask) magap sa ra na, jawng wang kata masat da ai shara hta ta kashin ngut ai hpang she mying hkapla ai shara de sa ra na, masat da ai shara kaw hkum kahtet shadang shadawn hkamla ra na hte mying bang ai ten langai hte langai pe 3 gang hkat ra na re.
Alen Bum Hpaji Jawng hta gaw June shata 23 ya shani Hpun Lum Yang Dabang, Hpung Mai Yang hte Sut Mu Awng mare kaw na jawngma ni hpe hkapla na rai nna, June shata 24 ya shani hta gaw Je Yang Dabang kaw na jawngma ni hpe hkap la sa wa na re.
Sumtsan jawngma (Boarder nga na jawngma) ni hpe mying hkapla ai lam galaw ai hta, June shata 26 ya shani gaw Laiza mare, Woi Chyai Hpyen Yen Dabang, Mung Lai Hkyet, Ja Htu Kawng, Mung Seng Yang kaw na jawngma ni hpe hkapla sa wa na re.
June shata 27 ya shani gaw Maga Yang, Sha-it Yang, Pajau (Laisin) Hpyen Yen Dabang kaw na jawngma ni hpe hkapla na re hte June shata 29-30 ya shani gaw Dum Bung Hpyen Yen Dabang, Sinpraw hkran, Sammung hte kaga mare buga hkan na jawngma ni hpe hkapla sa wa na re lam chye lu ai.
Jawng hpe July shata kaw nna hpaw sharin sa wa na re majaw, Check Point shinggan de na sa wa ra ai jawngma ni gaw masat da ai Quarantine shara kaw Quarantine naw hkamla ra ai re majaw, lawan ai hku nna jawng de sa wa ra na lam, Quarantine atsawm sha hkamla ngut ai hpang she, Boarder de hkapla sa wa na re lam, Alen Bum Hpaji Jawng Up Sara Kaba Maru Hkawng Lum tsun ai kaw na chye lu ai.
