Amyu sha laknak lang rawt malan uhpung ( 7 ) gaw munghpawm mungmasa bawngban komiti hpaw shabawn

Myen asuya hte hkrumzup bawngban na matu, Amyu sha laknak lang rawt malan uhpung 7 a 4 lang ngu na manhkrum zuphpawng hpe “Wa” Mung Panghkam Muklum kaw April 15

ya kawn 19 ya du hkra, manga ya tup galaw ai hta “Munghpawm Mungmasa Jahkrup Komiti” ngu shamying masat dat ai lam chye lu ai.

Zuphpawng ngut ai hpang ndau shabra laika shapraw dat ai hta Myen asuya hte hkrum shaga na mungmasa bawngban komiti hpe “munghpawm mungmasa bawngban jahkrup komiti” ngu galai masat ai, komiti hta shanglawm ai ni a mying hpe masat shagrin dat ai, laknak lang uhpung 7 a policy ni jahkrat da nna, dai policy hpe hkapla ai kadai laknak lang uhpung, gara mungmasa party, hkungga ging ai gara salang ni hpe raitim, hkapla na chyinghka hpaw da ai lam ka da ai.

Dai komiti hpe UWSP, KIO, SSPP, NDAA, MNDAA, TNLA, AA uhpung ni hte hpaw shabawn da nna, Myen asuya hte hkrum shaga ai shaloi, uhpung langai dinghkrai hku nhkrum shaga na hte “Munghpawm mungmasa bawngban jahkrup komiti” ngu ai mying hte sha hkrum shaga na lam, myithkrum dawdan da ai hpe chye lu ai.

Myithkrum dawdan da ai lam ni hpe Myen Mung Gumsan Magam hpang de mung tang madun sa wa na re lam ndau shabra laika hta ka da ai hpe chye lu ai.