Amyu shayi ni a ntsa mazut roi rip ai lam ninghkap masat ninghtoi hpawng galaw
Laiza Muklum Sinpraw Majoi Gawknu hta amyu shayi ni a ntsa mazut roi rip ai lam ninghkap masat ninghtoi hpawng lamang hpe, November shata 26 ya shani galaw la lu sai re.
Ndai hpawng lamang hpe Wunpawng Mungdan Shanglawt Hpung, Ginjaw Amyu Shayi ni hte ta gindun nhtawm, Htoi Gendar ni woi awn nna, galaw ai re lam, saranum kaba Nbau Nang Pu tsun ai.
Hpawng lamang hta mahtat sumri hpraw shakap ya ai lam, Ginjaw Amyu Shayi Rung na Saranum Wangde Hkawn Shawng kaw nna, amyu shayi ni hpe mazut roi rip ai lam hpe makawp maga ga, rau jawm ninghkap ga nga nna mung tsun ai, Amyu Shayi ni hpe mazut roi rip ai lam hte seng nna, hpawngsa shawa masha ni hpe laksan hku nna, Saranum Kaba Labang Hkawn Ja, Saranum Kaba Nbau Nang Pu hte Sara Seng Htoi Naw ni woi bawngban ai lam, san htai lamang hte ka manawt hkrang shala ai lamang ni galaw ai re.
Amyu shayi ni hte shayi num kasha ni a ntsa mazut roi rip ai lam ninghkap masat ninghtoi hpawng galaw ai a, yaw shada lam hpe Htoi Gender Director Saranum Kaba Nbau Nang Pu ndai zawn tsun ai.
“Amyu shayi ni hpe mazut roi rip ai lam hpe nra sharawng ai ngu ai hpe madun lu na matu, amyu shayi ni hpe mazut roi rip ai lam hta ninghkap ai bungli kaw shanglawm lu na matu, tinang mung mai galaw nga ai ngu ai hpe ningmu mu lu na matu hte ndai kaw na pru wa ai hte shanglawm sa wa na matu yaw shada let galaw ai re”
Hpawng hta Magam Dap, Makan Dap shagu na saw shaga da ai amyu shayi ni, CDM na amyu shayi ni, NGO na amyu shayi ni, Laiza Muklum kata na amyu shayi ni hte Woi Chyai IDP camp, Je Yang IDP camp, Hpun Lum Yang IDP camp na amyu shani ni yawng marai 350 jan sa du shang lawm ai lam chye lu ai.
November shata 25 ya shani kaw nna, December shata 10 ya nhtoi 16 ya laman, shamu shamawt ai hta mungkan shinggyim ahkaw ahkang kaw du hkra Num/La hkrang nbung ai a ntsa ningpawt tawn nna, mazut roi rip ai hpe ninghkap ai lam, Amyu Shayi ni a ahkaw ahkang a matu, Mungkan ting shamu shamawt ai lam hpe galaw nga ai hpe mung chye lu ai.
