Amyu shayi ni a ntsa mazut roirip ai lam, ninghkap masat nhtoi lamang galaw
Amyu Shayi Hpung Ginjaw kaw nna woi awn galaw ai, amyu shani ni a ntsa mazut roirip ai lam, ninghkap masat nhtoi lamang hpe November shata 28 ya jahpawt hkying 7:30am aten kaw nna, Laiza Muklum kata galaw nga ai lam chye lu ai.
Ndai zawn lamang galaw ai a yaw shada lam hpe Laiza Muklum Amyu Shayi Amu Madu, Hpawmi Nhkum Htu Nan tsun ai hta
“Dai ni anhte myusha ni dinghku kata hta raitim, num la madu jan madu wa kashu kasha ni raitim mung, dinghku kata kaw simsa ai, chye na hkat ai dinghku, langai hte langai mazut roirip ai dang sha ai hku na nre ai sha, ngwi pyaw ai simsa ai hku na dinghku woi de na hpe ra sharawng ai, amyu shadang ni tinang a amyu shayi ni hpe lam amyu myu hku na roirip mazut ai lam ni mat wa lu na matu yaw shada nna galaw ai lam re” nga nna tsun ai.
Dai ni na lamang hta Laiza Muklum amyu shani hpung kawn, lam kaba ntsa lam hkawm shinggrup let, ningmu jahpaw hkaw tsun ai lam, laiwa laisa mungshawa ni hpe ningmu jahpaw laika pa gam garan ai lam ni hpe galaw ai re.
Laiza Muklum kata lawk shagu na amyu shayi yawng marai 100 jan shanglawm ai hte galaw nga ai rai nna, laiwa sai aten ni hta mung ndai zawn re lamang hpe galaw ai re lam chye lu ai.
