Asuya lahta tsang hpaji jawng hpaw ai hpang San Luka Hkawlik Jawng hpaw na
San Luka Hkawlik a 2020-2021 ning hpaji sharin ladaw hpe Asuya lahta tsang hpaji jawng hpaw ai hpang, July shata 23 ya shani jawng hpaw sa wa na matu ntsa lam masat da sai re hpe na chye lu ai.
Jawng lung na jawngma nnan ni hpe online hku nna jawng mying naw hkap la nga ai re hte jawng shang na jawngma ni gaw nawku hpung hte sasana amu hta myit lawm nna tsawra myit hte apnawng dawjau mayu ai ni rai ra na, Dakkasu Jan Mau lu ai, shing nrai tsang 10 awng ai, shing nrai nlaw htum tsang 10 htai yu ai ni rai ra na, asak 19 ning lahta rai ra na, Ginwang up jau a madi shadaw laika mung lawm ra na hte hkamja zet let ai ni rai ra na re.
Jawng lung ladaw 2 ning rai nna, jawng lung jarik Gumhpraw Kyats 500000 (Sen Manga) hte Stationary, Uniform manu laksan bang ra na re lam chye lu ai.
Jawng hta Diploma madang hku sharin achyin ya ai rai nna, sharin ginhpan (Subject) ni gaw, Ja Chyum Mungga, nawku hpung a matsun ga ni, ninghpawt ninghpang Karai masa hpaji, myit jasat, kyang lailen nga sat nga sa hte seng ai Karai masa, sharin ladat hpaji, sasana magam hte seng ai hpaji, nawku dawjau lam, Sacrament, wenyi sak hkrung lam, akyu hpyi ai lam, sasana magam hte shinggyim wuhpung wuhpawng hte seng ai ningbaw ningla hte yu hpareng hpaji, hkamja lam, shinggyim bawngring lam, byin nga ai shingra tara lam hpe shadum jahprang ya ai lam, tara rap ra lam, simsa lam, shingni hpaji, tsun shaga lam, yu ngwi, htunghking hpe hpaw hpyan yu ai lam, myit sawn hpaji hte seng ai lam, kan bau dinghku madi shadaw hpaji hte kaga sharin ginhpan ni hpe sharin ya ai re lam chye lu ai.
San Luka College hta English hte Computer Subject hpe mung sharin ya na rai nna, San Luka College hpe Myitkyina, E-din mare kaw hpaw ninghtan da ai re hpe chye lu ai.
