Aten lai malu masha hpe wannat jahten kau ai lam galaw

Laiza Muklum kata, Muklum Hkamja Komiti kaw na woi awn galaw ai, aten lai malu masha ni hpe wan nat jahten kau ai lam hpe August shata 26 ya shani galaw la lu sai.

Uphkang Rung, Hkaja Rung, Balik Dap, Municipal na magam gun ni shang lawm let, August shata 21, 22 ya shani Muklum kata nga ai gat seng ni hta na rim tawn da sai, Myen gumhpraw sen 5000000 Kyast jan manu nga ai, malu masha arung arai amyu myu hpe wan nat jahten ai lam galaw ai hpe chye lu ai.

Yaw shada lam hpe Muklum Hkamja Du Kareng Tu Ja tsun ai hta “Aten lai malu masha ndai zawn re ni hpe gaw ndut sha lu na matu, mari lu mari sha ai ni a matu mung, akyu rawng ai hku na mari lu mari sha lu na matu, hkamja lam hte bung pre lu na matu re” nga nna tsun ai.

Matut nna ndai zawn galaw ai lam hte seng nna mungshawa ni hpe ningmu jahpra dan ai lam hpe Muklum Ningtau Up Hkang Du, Salang Kaba Oilaw Zau Seng Maw tsun ai hta

“Muklum kata hta gaw magam gun dinghku ni grai law ai, shawng lam hkan nga ai magam gun ni shata kum hpa lu ai ten, tinang a kashu kasha ni hpe muk manu jaw ai, dai hte sha she ma ni mari sha ai re. Dai majaw ndai zawn re aten lai malu masha ni hpe dut jaw, mari sha re ten hta aten na wa yang, ma ni a bawng ring lam hta mung grai sum machyi ai, nbyin gying ai ana ni mung byin wa mai ai dai zawn re ni hpe makawp maga mayu ai re,

Matut nna dut lu dut sha ai seng madu ni hpa mi raitim ndai gaw tinang a buga ginra re tinang a seng kaw dut taw nga ai arung arai gara gaw aten lai wa ai, ngu ai hpe gaw tinang mu taw nga chye taw nga ai re majaw, hpang de mung tinang seng kaw e dut taw nga ai rai ni aten lai yang ndut jaw ga zing kau nat kau ai lam galaw ga, ndai malu masha ni hpe e dut jaw dat ai a marang e kade nlu su wa ai, ndut jaw ai a marang e kade n yawm wa ai re majaw hpang e ndai hku n galaw ga” nga nna tsun ai.

Ndai zawn aten lai malu masha rim, wan nat jahten ai lam hpe shaning shagu galaw ai rai nna, matut nna mung galaw sa wa na re lam chye lu ai.