Aten masat nna dut lu dut sha ai lam galaw
Woi Chyai Hpyen Yen Dabang Yu Reng Komiti ni lit la nhtawm, Covid-19 ana zinli hpe tau nau makawp maga lu na matu, April shata 30 ya shani kaw nna May shata htum du hkra Woi Chyai hpyen yen dabang kata kaw gat dut lu dut sha ai lam hpe aten nhtoi masat nna dut gin len ai lam galaw nga sai re.
“Laiza Muklum Municipal a matsun hte maren, gat dut lu dut sha ai lam masha hpawng chyawm ai lam hpe shayawm kau lu na matu, bat hpang 3 ya hte 6 ya hta gaw gat hpe dam lada ai hku dut shangun ai.
Ngam ai nhtoi ni hta gaw Woichyai hpyen yen dabang Gawk Nu kaw gat lawk hkrang jahkrat nhtawm, jahpawt hkying 6:00am kawn hkying 8:00am aten du hkra hte shana de hkying 4:00pm kawn hkying 6:00pm aten du hkra aten masat nna, si mai si maw nam law nam lap ni dut shangun ai lam re” nga nna Woi Chyai Hpyen Yen Dabang, Ningtau Dabang Up Salang Hpauyam La Ja tsun ai.
Gun rai ni hpe laiza muklum Covid-19 Ana Zinli Makawp Ninghkap Komiti ni matsun ai hte maren, Mai Sak Pa gat lawk kaw na mari la nhtawm, gat dut ai ni yawng hpe shaga zuphpawng la nna dabang masha yawng mari sha lu na hku manu hpe hkyamsa ai hku dut shangun ai re lam chye lu ai.
Woi Chyai hpyen yen dabang hta hpyen yen htinggaw yawng 6500 jan nga ai rai nna, Covid-19 ana zinli makawp maga lam hpe Ginjaw hkamja dap hte KDG ni pawng hpawm nna ningmu jahpaw hkaw tsun dan ai lam galaw ai re hpe chye lu ai.
