Awng Lawt mare lung wa ai lam hpe htu di kau nna bawm hkam na matu D.K.Ts kaw na matsun
Sinna Ginwang Ginjaw, KIA Dap Ba ( 2 ) Dap Dung ( 14 ) ginra, Awng Lawt mare de lung wa ai lam hpe Back-hoe hte htu di nna, bawm hkam kau na matu, Danai D.K.Ts hpyen dap kawn Mile ( 5 ) mare makau kaw dap jung ai Hk.M.Y ( 318 ) ni hpe matsun dat sai lam, ginra shisawk ni kawn chye lu ai.
Awng Lawt mare de lung wa ai shinggan manam hpe gaw, nshalai ma ai, dai grup yin hkan na Mare masha ni hpe gaw shanhte chye ai re majaw lai shangun ai raitim grai san jep ai, yi sun hkauna sa na rai yang, shanhte kaw mungchying masat ( မွတ္ပုံတင္ ) ap da ra ai, nga nna buga na salang langai tsun ai.
Ndai Awng Lawt mare de sa ai mungshawa ni hpe November 18 ya shani kaw nna Myen hpyen dap ni hkumpat kau sai re.
November 21 ya shani kaw nna mung, Dap Dung ( 14 ) ginra, Htang Bra pat maw hkan bungli galaw nga ai mungmasha ni hpe lawan pru na matu, Munghkawng mare kaw nga ai Myen hpyen ni tsun ai majaw, ya aten nkau mi Danai Muklum hta wa shingbyi nga ai lam chye lu ai.
