Awng Mye (1) makau grup yin de gumshem Myen hpyen dap ni nbungli bawm wa jahkrat
Waimaw Awng Mye (1) mare makau grup yin maga de gumshem Myen hpyen dap ni nbungli bawm wa jahkrat bun ai lam chye lu ai.
October shata 28 ya shani hkying 11:00am aten daram kaw nna, Awng Mye (1) mare makau grup yin de gumshem Myen hpyen dap ni, nbungli bawm, gunship ni hte numdaw lahkawng lang wa gap bun ai lam, lit nga ai salang ni kaw na chye lu ai.
Awng Mye mare makau grup yen hta gasat gala majan byin ai lam nnga ai kaw wa gap bun ai rai nna, masha hkra hkala ai lam, dum nta hten za ai lam nga nnga grai nchye lu shi ai re.
Matut nna October shata 27 ya shana hta mung, Mungmyit Sinli Ga (Kachin Sub-state) ginra, Sinli mare kaw gumshem Myen hpyen dap ni nbungli bawm wa jahkrat bun ai majaw, KBC nawku jawng hten za mat ai lam, ginra masha ni kaw na chye lu ai.
Gumshem Myen hpyen dap ni gaw ya aten gasat gala majan byin ai lam nnga ai shara hkan, nbungli hpe madung dat let bawm wa jahkrat gasat ai majaw, mungshawa ni asak si sum hkala hkrum ai hte dum nta ni hten za hkrum ai lam law law byin nga ai re.
