Balawng Dingsa gumshem Myen hpyen dap hpe KIA ni htim gasat nga
KIA Masat (3) Dap Ba, Masat (27) Dap Dung kata na hpyen hpung ni Balawng Dingsa gumshem Myen hpyen dap hpe htim gasat nga ai lam na chye lu ai.
February shata praw 1 ya jahpawt hkying 8:40am aten daram kaw na KIA hpyen hpung ni Balawng Dingsa gumshem Myen hpyen dap hpe htim gasat nga ai lam, lit nga ai salang langai tsun ai.
Hpyen masa lam gara hku rai nga ai hpe atsawm hkrak tup grai nchye lu shi ai, matut shagawn nga ding yang re nga nna, salang wa matut tsun dan ai.
Masat (27) Dap Dung kata na hpyen hpung ni, Kai Htik gumshem Myen hpyen dap hpe gasat padang dip lu ai hpang, Balawng Dingsa gumshem Myen hpyen dap hpe bai htim gasat nga ai re lam chye lu ai.
Matut nna KIA Masat (2) Dap Ba ginra hta mung, January shata 31 ya jahpawt hkying 7:30am aten daram hta Daru mare post kaw na dawm wa ai gumshem Myen hpyen dap n-gun (30) daram, KIA hpyen hpung ni shara la nga ai kaw gale pru wa ai majaw, KIA ni hkap gap ai kawn, gasat gala majan byin wa ai re lam chye lu ai.
