Balik jawng yu hpawng galaw
Wunpawng Mungdan Shanglawt Asuya, Mungchying Uphkang Dap, Balik Makan Dap kaw nna hpawng sharin nga ai, Masat Yan (17) ning pawt ning hpang balik jawng yu hpawng hpe galaw la lu sai lam chye lu ai.
August shata 28 ya jahpawt hkying 8:00am aten hta masat yan (17) ning pawt ning hpang balik jawng yu hpawng hpe Myu Lawt Wunli Gawknu kaw galaw la lu sai re.
Jawng yu hpawng hta D.G.A Ningtau Lit Hkam, Salang Kaba Lagawng Tawng La kaw nna, jawng yu sai jawngma ni hpe shatsam mungga tsun ai hta
“Dai ni jawng yu sai jawngma ni yawng tinang hta ang wa ai magam bungli ni hpe nhprai ai sha kang kang ka ka sadi dung ai hte galaw gun hpai nna, myusha ni hpe shimlum lam jaw lu ai magam gun kaja ni byin tai sa wa ga” nga nna tsun ai.
Hpawng lamang hta jawng yu sai jawngma ni hpe lekmat shagrau ai lam, ningtawn ai jawngma ni hpe kumhpa shagrau ai lam ni galaw ai rai nna, wunkat hpe gaw lai wa sai April shata praw kawn hpaw sharin hpang wa ai re hpe chye lu ai.
Jawngma yawng marai (160) jawng yu la lu sai hta la marai (140), num marai (20) rai nna, Magam Dap, Makan Dap hkan na magam gun ni, hpung woi sara ni, jawngma kanu kawa ni sa du shang lawm ai hte galaw la lu sai re lam chye lu ai.
