Balik jawng yu hpawng galaw
Wunpawng Mungdan Shanglawt Asuya, Mungchying Uphkang Dap, Balik Makan Dap kaw nna hpaw sharin nga ai, masat yan (18) ningpawt ninghpang balik jawng yu hpawng hpe July shata praw 5 ya jahpawt hkying 9:00am aten, Alen Bum kaw galaw la lu sai lam chye lu ai.
Jawng yu hpawng hta Balik Makan Dap Matsun Du, Lat Du Up Jum Gumrai Sharoi kaw nna shatsam mungga jaw ai hta
“Ta tut magam bungli galaw sa wa ai hta kangka htep lahti galaw sa wa nga mu, mungshawa wuhpung wuhpawng kata hta ta tut magam bungli galaw sa wa ai shaloi mungshawa a mayen kawk nmai tai ai, mungshawa a nampan kawk tai lu hkra shakut sa wa ra na re, tinang hta ang wa ai magam bungli lit hpe kabu kara myit hte galaw sa wa yang na a shawnglam rawt jat lam hta mung, grau nna masan sa n-gun lu wa na re, magam bungli hta hka ja let galaw, galaw let hka ja sa wa yang chye chyang kunghpan wa na re, kadai tara hten hten tinang nmai len ngu ai hpe lashum tawn nna galaw sa wa mu” nga nna tsun ai.
Ningpawt ninghpang balik jawng hta balik magam gun langai hkan sa ra ai lam, chye ging chye ang ai balik hpaji ni hpe sharin ya ai rai nna, jawngyu sai jawngma yawng marai (129) nga ai hta ningtawn ai jawngma ni hpe mung, shagrau sha-a ai lam ni galaw ai hpe chye lu ai.
Balik Makan Dap kaw nna shaning shagu balik wunkat hpaw sharin ai lam galaw nga ai hta asak (18) ning a lahta ramma ni, ka-ni nanghpam nlu sha ai ni, hkamja zet let ai ni hpe hkapla sharin ya nga ai lam chye lu ai.
Jawng yu hpawng hta saw shaga da ai Magam Dap, Makan Dap hkan na magam gun ni, nawku hpung woi sara ni hte jawngma kanu kawa ni sa du shanglawm ai hte galaw la lu sai lam chye lu ai.
