Bang Htan, Ulu Hkyet kaw gasat majan byin

KIA Dap Ba ( 3 ) Dap Dung ( 12 ) hte ( 27 ) ginra, Bang Htan, Ulu Hkyet kaw, November 23 ya shani ka-ang hkying 12:45pm aten kaw nna, shana hkying 6:00pm aten du hkra, Dap Dung ( 12, 27 ) pawnghpawm hpyen hpung hte Myen hpyen hpung ni laja lana gap hkat ai lam, shawnglam shisawk ni kawn chye lu ai.

Gasat majan byin ai shara de, Gadaw Nhkang Bum kaw shara jahkrat nga ai Myen hpyen hpung ni, sinat kaba 60mm hte gap bun ai.

KIA Dap Dung ( 12 ) hte Dap Dung ( 27 ) ginra de Myen hpyen hpung ni shamu shamawt lung wa ai majaw, November 14 ya shani kaw na gasat majan numdaw mi bai byin wa ai re.

Ya majan byin nga ai shara hta Myen hpyen n-gun 300 daram nga ai, majan gaw grau grau pi laja wa na masa nga ai lam, shawnglam shisawk ni shana wa ai kaw na chye lu ai.