Bangnoi buga, Namrim mare na ramma langai kahtam sat hkrum

Mungmyit Sinli Ga (Kachin Sub-state), Kutkai Ginwang Bangnoi buga, Namrim mare na Salang Zahkung Lum Hkawng hte Jan. Tangbau Zawng Nan yan a kasha Shadang Zahkung Seng Li asak (20) ning hpe November shata 28 ya shana daw hkying 2:20pm aten daram hta Kutkai Galile daw 8 makau Modo lam kaw kadai re nchye ai la kasha marai 3 nhtu hte kahtam sat kau da ai lam na chye lu ai.

Namrim mare na ramma marai 3 gaw, November shata 29 ya shani galaw na chyeju dum poi a matu cycle langai hpra jawn nhtawm, Kutkai mare kaba de arung arai sa mari nna bai nhtang wa ai lam kaw, kadai re nchye ai cycle langai hta pawng jawn ai la kasha marai 3 gaw, nhtu hte Shadang Zahkung Seng Li a du krung kaw kahtam kau da ai hpang lalam 20 ram kaw galau mat nna jawm sharawt yu yang, du lasa hte bawnu ni yawng hkra mat ai majaw, tsi rung garai ndu shi laman nsa hti mat ai re lam, Namrim mare na Sara Shekoi Dau Ze tsun dan ai.

Ndai Ma ni gaw hpa manghkang mung nnga ai, bum kaw na rai gan htaw na matu sha yu wa ai lam kaw nmyit mada ai nhkru nshawp ai ni a lata kaw byin mat wa ai rai nga ai. Moimang hpe November shata 29 ya shani makoi mayang na re lam, ndai masha sat manghkang hte seng nna nta masha ni Myen Balik Dap kaw amu shawk shawn da sai lam, Sara matut tsun ai.

Shadang Zahkung Seng Li hte rau sa ai manang yan gaw hpa nbyin ai lam, masha sat ai marai 3 hpe lit nga ai Balik ni kaw nna sagawn nga dingyang re lam chye lu ai.

Hpa mara nnga ai ramma ni hpe Mungdan Asuya, Magam Dap hkum hkra nga ai Muklum mare kata hta ya na zawn byin ai lam gaw shim lum lam nnga sai ngu ai hpe mu lu ai. Anhte mungshawa ni a matu hkit tsang hpa byin nga sai, shim lum lam hpe kadai lit la na ngu gaw myit yu hpa, myit tsang hpa de du nga sai lam, Kuthkai mare masha ni tsun nga ma ai re.

Mungmyit Sinli ginra hta masha sat manghkang ni jahkring hkring byin ai raitim, kadai wuhpung wuhpawng ni lit la hparan ya ai lam nnga ai sha n-ga, masha lu rim nna Myen Asuya Balik Dap de ap ai raitim, manghkang shabyin ai masha ni hpe ahkyak la jep chyoi ya ai lam nnga ai sha, bai dat kau ya ai lam ni byin nga ai majaw, Mungmyit Sinli ginra kata shanu nga ai mungmare masha ni kam hpa na wuhpung wuhpawng nnga, myit kaji hkrit tsang nga ai lam chye lu ai.