Baw De gumshem Myen hpyen post hpe KIA ni htim gasat nga
Mungmyint Sinli Ga (Kachin Sub-state) ginra, KIA Masat (4) Dap Ba, Masat (34) Dap Dung kata na pawng hpawm hpyen hpung ni, Mungmyit Byuha hpe makawp let, jahkring mi gan nga ai, Baw De mare makau na gumshem Myen hpyen dap post hpe htim gasat nga ai lam chye lu ai.
Mungmyit Buga, Kin Chyaung, Baw De mare makau kaw, Mungmyit Byuha hpe makawp let jahkring mi gan nga ai, gumshem Myen hpyen dap post hpe KIA hpawng hpawm hpung ni, January shata 12 ya jahpawt hkying 8:00am aten daram kaw nna htim gasat nga ai lam, shawng lam na lit nga ai salang langai tsun ai.
KIA pawng hpawm hpyen hpung ni htim gasat nga ai ten, gumshem Myen hpyen dap nbungli 3 hte bawm wa jahkrat bun ai lam nga ai hte hpyen masa gara hku rai nga ai lam matut shagawn nga dingyang re hpe salang wa matut tsun ai.
Lai wa sai January shata praw 1 ya shani hta mung, Masat (34) Dap Dung kata na pawng hpawm hpyen hpung ni, Manbat mare kaw dap jung nga ai, gumshem Myen hpyen dap hpe zing madu la lu sai re.
