Bawngban group garum hpung kawn, gaw ningja dabang de sa du gawan garum jaw ai lam galaw
Bawngban group online garum hpung ni kaw nna, gaw ningja dabang de January shata kawn, sa du gawan garum jaw ai lam galaw ai hpe chye lu ai.
Sa du gawan garum jaw ai hte seng nna, Bawngban group online garum hpung Saranum langai ya na zawn tsun ai hta
“Myu mungdan hpe tsawra rai nna, myu mungdan hpe makawp maga ya ai marang e, lagaw lata nhkum nzup mat ai, gaw ningja ni yawng hpe nmu nchye hkat ai raitim mung, galoi mung shingdu de na hkungga tsawra manu shadan nga ga ai ngu ai hpe sakse madun mayu ai hku nna garum jaw ai lam re” nga nna tsun ai.
Ya na zawn sa du gawan garum jaw ai hta Ginjaw ginra kaw sha n-ga, Masat (3) Dap Ba ginra hte rawt malan hpu nau AA kata nga ai, gaw ningja dabang ni de mung, sa du gawan garum jaw ai re hpe chye lu ai.
Laiwa sai shaning ni hta gaw, December shata hta sa du gawan garum jaw ai lam galaw ai raitim, ndai kalang gaw January shata hta she sa du gawang garum jaw lu ai re hpe chye lu ai.
Bawngban group online garum hpung hpe laiwa sai 2015 ning kawn hpaw da ai online group rai nna, gaw ningja ni hte hpyen yen tsin yam hkrum nga ai ni hpe dangdi dangdep ai daram garum jaw nga ai hpung re ai hpe chye lu ai.
