Bawsang laika Sara tai sharin hpawng galaw
Myitkyina Ginwang laili laika komiti kaw nna woi awn galaw ai Bawsang laika Sara tai sharin hpawng hpe March shata praw 2 ya shani kaw nna 6 ya shani du hkra Jan Mai buga kaw sharin ya nga ai lam chye lu ai.
Karai Kasang jaw da ai tinang a amyu, laika hpan ni hpe manu shadan chye na matu yaw shada let sharin hpawng galaw ai re hte Bawsang laika rai nga ai Ngoochangh laika, Lacid laika, Lhaovo laika hte Zaiwa laika hpan 4 hpe sharin ya ai re lam, KBC Laili Laika hte Labau Komiti Hpa-awn Saranum La-u Hkaw Tswi tsun ai.
Ngoochangh laika hpe Sara La-u Lang Bawm, Lacid laika hpe Saranum Shichyang Ting Lung, Zaiwa laika hpe Sara Sumlut Nawng Lat hte Lhaovo laika hpe gaw Sara Zahkung Zau Tang ni sharin ya ai lam chye lu ai.
Bawsang laika sharin hpawng galaw ai hta ndai kalang gaw 4 lang du sai re hte sharin hpawng hta Myityina Ginwang kata buga hpung kaw na sharin sara tai wa na sara/num ni yawng marai 29 sa du sharin hkam la nga ai re lam chye lu ai.
