BGF (1003) dap hpe KIA zing

Kanpaiti, Sadung lam ntsa Shingchyai mare makau kaw dap jung nga ai, BGF (1003) dap hpe KIA ni gasat zing la lu sai lam chye lu ai.

Shingchyai mare makau kaw dap jung nga ai, gumshem Myen hpyen dap n-pu na, jarit makawp BGF (1003) dap hpe October shata 18 ya jahpawt KIA pawng hpawm hpyen hpung ni padang dip zing la lu sai lam, lit nga ai salang langai tsun ai.

BGF (1002) hpyen dap hpe October shata 14 ya shani gasat zing la lu ai hpang, October 18 ya shani (1003) dap hpe bai htim gasat zing madu la lu sai re.

Kanpaiti hte Pang Wa ginra ni hta dap jung nga ai, gumshem Myen hpyen dap n-pu, BGF, P.T.Ts dap shara ni nhkrat sum na matu, gumshem Myen hpyen dap maga na nbungli ni hte gap garum ai lam ni nga ai raitim, KIA pawng hpawm hpyen hpung ni ya na zawn gasat zing la lu ai lam chye lu ai.