Buga lamu ga hkang zing makawp maga wunkat galaw

Kutkai ginwang ( KGZ ) bawngring dap kaw nna woi awn ai hte buga lamu ga hkang zing makawp maga wunkat hpe Mung Myit Sinli Ga, Htunghking manau wang gawknu kaw September shata 25 ya shani kaw nna 26 ya shana du hkra galaw ai lam chye lu ai.

Madung yaw shada ai lam gaw buga ginra shingra madu, ginra madu ni a lamu ga hpe masha laga chyasam ni a lata de nshang mat na matu hte makawp maga la, tara shang hkang zing la chye na matu yaw shada let ladat mahkrun ni hpe ningmu jahpaw sharin ya ai re lam wunkat kaw shang lawm ai Salang langai tsun dan ai.

Ndai wunkat galaw ai lam gaw yaten na anhte buga ginra masa hta ra nan ra ahkyak makawp maga hkang zing la ra ai lam ni nga ai re majaw hkyak hkyak ndai hpe ningmu jahpaw ai lam re. Anhte buga ginra kaw ja gumhpraw arang kaba ai lau ban ni, lamu ga mari maden shang wa ai zawn re, wuhpung wuhpawng langai ngai kaw nna ahkaw ahkang hte lamu ga ni hpe zing madu la wa ai zawn re ni, wan leng lam hpe kapaw lai di na zawn re masa lam ni a majaw anhte buga ginra madu ni a moi jiwoi jiwa ni kaw nna hkang zing makawp maga hkrat wa ai lamu ga ni, ya dai ni tat sum mat wa na masa nga ai majaw, nkau mi gaw tat sum kau ai ni mung nga sai re majaw buga lamu ga hkang zing ningmu jahpaw wunkat galaw ai lam Salang wa matut tsun ai.

Wunkat hta KGZ bawngring dap hpu-awn Rev. Labya Seng Lun kaw nna ya na masa hte seng nna lamu ga masa ni hpe ningmu jahpaw ya ai, Sara Kareng Hkam Awng hku nna tinnang a ginra lamu ga hpe tara shang hkang zing makawp maga chye na matu laika ka hkrang, htung tara, lamu ga tara ni hpe sharin ya ai rai nna, Sara Nhkum Doi Nan hku nna phone hte lamu ga hpe shadawn dip chye na matu hte sumla hpe chye hkrang shapraw na matu phone kaw tatut shadawn sharin ya ai lam ni hpe galaw ai.

Mungmyit Sinli na Amu Madu Sara Jang Maw Naw Hkam hku nna mung lamu ga upadi tara ni hte seng nna Asuya de shawk shawn laika bang ai shaloi Mungmyit Sinli Htunghking ginjaw komiti ni kaw nna madi shadaw ai hte dazik dawk nna mara dat ai hpe Asuya ni kaw nna tara shang hkap la shagrin ya na re hpe sang lang dan ai lam galaw ai.

Wunkat hta Kutkai ginwang kata, buga hpung 14 kaw na marai 2 hpra, yawng marai 24 tup sa du sharin hkam la nga ai lam chye lu ai.