Bum Awng Nan mare Shanglawt Asuya lawu tsang jawng hta jawng lang arung arai yak hkak nga

Sinpraw Ginwang Ginjaw, Manmaw Ginwang, Nba Pa Ginwang Daw, Bumsen Bum Ninghtawn, Bum Awng Nan Mare Shanglawt Asuya lawa tsang jawng hta jawng lang arung arai hte jawngma ni lang arung arai yak hkak hkrum nga ai lam, buga masha ni tsun ai kaw na chye lu ai.

“Jawng kaw galup da ai hpri tsut ni mung baw mat nna, mai byin ai hku kapa lang nga ga ai. Jawngma ni lang na laika bala, hketan ni mung alaw alam nlu lang ai, mari na nga yang mung gat hte tsan ai, Nba Pa gat hte Nmawk gat de sa ai, shawoi gaw Nmawk gat sa yang bai lu nhtang wa ai, ya gaw lana mi yup nna hpang jahpawt jau na lung wa ra ai” nga nna Bum Awng Nan Mare na saranum langai tsun dan ai.

Bum Awng Nan Mare Asuya lawu tsang jawng hta jawngma marai 41, jawng sara La marai (1) saranum marai (5) yawng marai (6) re. Ya aten hta jawngma ni kaw kan mase madawn, jahkru ai ana zinli ni byin nga ai majaw jawng nlu sa shi ai ni naw nga ai, ndai ana gaw masha kaba ni hta mung byin nga ai lam, saranum tsun ai.

Thai Mungdan hta rung jung ai Kachin Women’s Association Thailand (KWAT) wuhpung ni kaw nna shata mi hta kalang laban bat mi daram sha na matu, tsi mawan ni garum jaw ai lam gaw nga ai raitim, machyi masha law wa ai shaloi grai yak hkak ai lam, buga masha ni tsun ai kaw na chye lu ai.

Bum Awng Nan Mare hta nhta htinggaw 48 nga ai hta 2018 ning kaw hpyen majan a majaw, nkau mi Shanglawt uphkang ginra Mai Kung Mare de yen ai ni nga ai zawn nkau mi gaw Myen uphkang ai shara Nmawk de law malawng yen mat ai re.

Mai Kung Mare de yen ai htinggaw (8) rai nna, ndai ni gaw lanam langai sha nga nhtawm, dinghku kata grai yak hkak wa ai majaw, mare buga de bai wa nga mat sai. Nmawk de yen ai ni gaw hpyen yen kaw na tsep kawp wa mat ai hku nre sha, wa dat sa dat rai galaw nga ai, nkau mi gaw, Nmawk hte makau grup yin shara ni hta nta wang htingra lu mat ai ni mung nga sai, shata shagu ngu na garum gumhpraw ni mung lu ma ai. Mai Kung de yen ai ni gaw, nta buga de bai wa nga ai hpang kadai wuhpung ni garum ai mung nnga ai, dai majaw garum la na hpe myit mada ai lam, Bum Awng Nan Mare na salang langai tsun ai.

Hpyen n yen ai aten hta gaw nta htinggaw 48 rai nna, ya gaw nta htinggaw 32 bai wa nga ai lam chye lu ai.