Bum Ra Yang hpyen yen mungshawa ni malu masha hte arung arai ra kadawn nga

Gwi Htau hpyen majan a majaw, Njang Yang lahta Ngum La dingda maga, Bum Ra Yang mare de hprawng koi yen wa ai hpyen yen mungshawa ni marai 1000 mi daram a matu malu masha hte lang rung lang rai ni ra kadawn nga ai lam, hpyen yen mungshawa ni tsun ai kaw na chye lu ai.

Hkawm sa hkawm wa hkrun lam yak hkak ai sha n-ga, malu masha, nga shara ginsum galaw na matu Plastic Muka, tsi mawan hte kaga lang rung lang rai ni ra ahkyak nga ai lam, hpyen yen camp na lit nga ai salang langai tsun ai.

“Gwi Htau majan a majaw Njang Yang ginwang kata na mare ni lawu de hprawng ai pang mi, lahta de hprawng ai pang mi rai nga, lawu de hprawng ai ni gaw Myitkyina hpyen yen camp de du sai, ya Bum Ra Yang mare kaw nga ai ni gaw lahta de hprawng ai pang ni rai nga ai” nga nna salang wa matut tsun ai.

Ya aten Bum Ra Yang hpyen yen htinggaw 194 rai nna, mungshwa marai 1000 mi daram shanu shingbyi nga ai hte hpyen yen htinggaw 20 bai jat wa na re hpe mung chye lu ai.

Ndai hpyen yen ni gaw laiwa sai March shata hta KIA hte Myen Hpyen Dap ni numdaw mi gasat gala majan bai byin wa ai majaw, hkrit tsang nna hprawng koi yen wa ai hpyen yen mungshawa ni re lam chye lu ai.

Photo Credit; Uma Shadang