Bumre hte Hka Ya Bum kaw dung ai gumshem Myen hpyen dap ni, Laiza gryip yin shara ni de laknak kaba hkrup mara gap bun

Ginjaw ginra, KIA Masat (5) Dap Ba ginra, Bumre hte Hka Ya Bum kaw dung ai gumshem Myen hpyen dap ni, Laiza makau grup yin shara ni de, laknak kaba hte hkrup mara gap bun ai lam nga ai.

July shata 14 ya shana hkying 10:50pm aten hta 3 lang, July shata 15 ya jahpawt hkying 4:53am aten daram hta 2 lang, bai gap bun ai lam chye lu ai.

KIA Ginjaw ginra, Nam San Yang hpyen man maga de gumshem Myen hpyen dap ni hpyen n gun law law hte htu shadut shang wa ai majaw, lai wa sai July shata praw 3 ya shani kaw nna ninghtoi 10 ya jan gasat gala majan shani shagu ngu na byin nga ai re.

Gumshem Myen hpyen dap ni htingnut mat ai lam nnga yang gaw, gasat gala majan gaw matut nna naw byin wa mai ai hte ya aten hta mung lahkawng maga hpyen masa naw shaja hkat nga ding yang re lam, shawng lam kaw nga ai lit nga ai salang ni tsun ai kaw na chye lu ai.