Chihpwi ginra kata na gumshem Myen hpyen dap shara 3 hpe KIA matut zing
KIA Masat (7) Dap Ba, Chihpwi ginra kata hta dap jung nga ai, gumshem Myen hpyen dap shara 3 hpe KIA ni bai matut zing la lu sai lam chye lu ai.
September shata 30 ya shani hkying 10:00am aten daram hta Chihpwi sa lam ntsa, Shagawng mare makau kaw dap jung nga ai, gumshem Myen hpyen dap hte sin kawp dap kaji (2) hpe KIA pawng hpawm hpyen hpung ni matut zing la lu sai lam, lit nga ai salang ni kaw na chye lu ai.
September shata 29 ya shani hta mung, Chihpwi Byuha kawng hte Balik dap, Deng 4 grup yin kata hta dap jung nga ai gumshem Myen hpyen dap ni hpe padang dip la lu sai re.
Matut nna Hpakant hte Manmaw Nmawk ginra ni hta mung, KIA hte gumshem Myen hpyen dap ni gasat gala majan matut byin nga ai rai nna, lahkawng maga hpyen masa shaja hkat nga ding yang re hpe chye lu ai.
