Chihpwi kaw hka kaba wa ai majaw dum nta hten za hkrum
Chihpwi mare kaw hka kaba wa ai majaw, mungshawa dum nta htinggaw (100) jan hten za hkrum mat ai lam chye lu ai.
May shata 31 ya shani kaw nna marang kaba htu sawng ai majaw, Nmai hka kaba wa nna, Chihpwi mare hpyen yen nta htinggaw (125) hte Chihpwi mare na nta htinggaw (42) hka hta yawng lawm mat, hten za hkrum mat ai lam, ginra masha ni kaw na chye lu ai.
Ndai zawn dum nta ni hka hta yawng lawm, hten za hkrum mat ai rai nna, ya aten mungshawa (857) jan nga shara hte malu masha yakhkak nga ai majaw, Chihpwi mare woi awn komiti hte buga hpung kanu kawa ni pawng hpawm let, hkyak hkyak gan nga na shara hte malu masha ni hpe woi awn hparan ai lam ni galaw nga ai hpe chye lu ai.
Mali hka hte Nmai hka, hka hku de marang kaba htu sawng ai a majaw, Myitkyina Muklum kata hta mung lamu ga nyem ai shara nkau hkan, hka lim shang ai lam ni nga ai hpe chye lu ai.
