Chyoi pra ai Udang shagrau poi hpawng lamang galaw
Laiza Jau Ginwang ni woi awn nhtawm 18th ang ngu na Chyoi pra ai Udang shagrau poi hpe September shata 14 ya shani hkying 11:00am aten hta Laiza Muklum Woi Chyoi Bum kaw galaw ai lam chye lu ai.
Shani ka-ang hkying 12:00non aten daram hta gaw Wa Jau Peter Lazum Tu Lum ( Laiza Ginwang Up ) hte Ningtau Ginwang Up Jau ni woi awn nna Missa hkungga nawng jau ai lam hpe galaw ai.
Wa Jau Mahte Mwihpu Naw Grawng ( Ningtau Ginwang Up Jau ) kaw nna Udang hte seng ai labau ni hte chyum laika hpe lakap nna Karai Kasang a mungga hpe htawn tsun ai.
Missa hkungga nawng jau hpawng ngut ai hpang laksan saw shaga da ai magam dap, makan dap na kanu kawa ni, Wa Jau, Mama ni hte bungli galaw ai hta shang lawm ai ni manhkrum lu sha jawm sha ai.
Udang shagrau poi hta sa ai shawa masha ni a matu gaw poi komiti ni kaw nna muk tawng langai hte hka tau langai jaw ai rai nna lawk shagu kaw na hpaw da ai gat seng ni hta shat kada ni hpe mung Myen gumhpraw lap 2000 hte alu fund hku nna dut garan ya ai lam galaw ai.
Ndai Udang shagrau poi byin tai wa na matu lai wa sai August shata kaw nna sa ra lam hkyen jasan ai lam, Udang Bum hta ra ai magam bungli ni hpe galaw shajin nna poi lamang hpe galaw la lu sai lam, poi shabyin shatai komiti ni kawn chye lu ai.
18th lang na Udang shagrau poi hta laksan saw shaga da ai manam ni, Mandung Jau Ginwang na Wa Jau Pactrick Jangmaw Mun Wa, Manmaw Sara Daw Ginwang na Mama Merry Male Lu Mai, nawku hpung shagu na hpung masha ni hte sara ni, magam dap makan dap na magam gun ni yawng marai 3600 jan wa du shang lawm nna angwi apyaw hte galaw la lu sai lam chye lu ai.
