Chyoipra ai Udang shagrau missa hkungga akyuhpyi hpawng galaw
Laiza Jau Ginwang, 21 lang na Chyoipra ai Udang shagrau missa hkungga akyuhpyi hpawng hpe Woi Chyai Udang Bum kaw, September shata 14 ya shani RCM nawku hpung kaw nna, woiawn let, galaw la lu sai re.
Missa hkungga akyuhpyi hpawng lamang hpe jahpawt hkying 8:00am aten hta kalang, hkying 11:00am aten hta kalang, numdaw lahkawng lang galaw ai rai nna, mara raw akyuhpyi ai lam, missa hkungga nawng ya ai lam hte shawa akyuhpyi ai lam ni galaw ai.
Du sa ai shawa masha ni akyuhpyi lawm na matu ga baw law law jaw da ai hta “Mungkan ting simsa lu u ga, anhte a mungdan hta byin nga ai hpyen majan hpe lawan shazim kau ya nna ngwipyaw simsa wa na matu, anhte a buga ginra de tai hpyen a sharu shatsang ai lam yawng, hkrit tsang ra ai lam yawng kaw nna, makawp maga kau ya na hte hpyen majan a majaw, yak hkak jamjau hkrum nga ai ni yawng hpe shimlum simsa ai chyeju jaw ya na matu” shalawm da ai hpe chye lu ai.
Chyoi pra ai Udang shagrau poi hpe shara shagu hta galaw nga ai re. Laiza Jau Ginwang kata kaw COVID rai nbyin ai shawng daw hta masha law law hte wu wu di di galaw lai wa sai raitim, ya gaw masa lam amyu myu a majaw wu wu di di nlu galaw ai lam ni nga ai hpe chye lu ai.
