Company ni kaw nna lung seng tam ahkang pat hkum da ai majaw, ye mase tam masha ni tam lu tam sha yak hkak hkrum

Hpakant, Gwi Hka Maw ga gyi ai makau grup yin ni hta company ni hte Gwi Hka mare uphkang salang ni kaw nna lung seng htu ahkang pat hkum da ai majaw, lung seng htu, ye mase tam masha ni tam lu tam sha yak hkak hkrum nga ai lam na chye lu ai.

Ya na zawn lung seng htu, ye mase tam ai lam hpe pat hkum da ai majaw, mung mare masha ni grai yak hkak wa nna, company ni kabai da ai, ga bum kaw bai tam lu tam sha ai lam galaw nga ai re nga nna Gwi Hka mare na Salang Nhkum Tang Gun tsun dan ai.

Gwi Hka ginra kata kaw nga ai Rudi masha ni hte Wunpawng amyusha ni law malawng gaw, lung seng hpe sha madung dat let kan bau bungli galaw sha ai masha ni law ai majaw, ya na zawn galaw lu galaw sha shara hpe aten galu pat hkum da ai rai yang, lung seng hpe madung dat galaw sha ai ni a matu, grai yak hkak wa mai ai lam, salang wa matut tsun dan ai kaw na chye lu ai.

July shata 10 ya shana hkying 11:00pm aten daram hta mung, lai wa sai ten ga gyi ai makau kaw sha, pe hkying masum jan tsaw ai ga n-gam bai gyi hkrat wa ai re hte ya aten dai makau grup yin shara ni ha grai hkrit tsang ra ai madang du taw ai majaw, lung seng htu na ahkang pat hkum da ai lam nga ai raitim, mung mare masha ni tam lu tam sha grai yak hkak wa ai majaw, mung shawa masha ni a matu galaw lu galaw sha shara masat ya na hpe ra sharawng nga ai lam na chye lu ai.

Gwi Hka Maw gaw lai wa sai July shata praw 2 ya shani ga gyi ai majaw, lung seng htu, ye mase tam nga ai masha marai 182 asak si sum mat ai shara re hpe chye lu ai.