COVID-19 ana hte seng ai bungli ni hpe bai maram dinglik yu ai zuhpawng galaw
KIO Ginjaw COVID-19 Ana Zinli Makawp Ninghkap Komiti ni woi awn nhtawm, COVID-19 ana hte seng ai bungli ni hpe bai maram dinglik yu ai zuhpawng hpe June shata 10 ya jahpawt hkying 8:00am aten kaw nna shana daw hkying 5:00pm aten du hkra Padang Hkrun Lam Majan Masing Woi Awn Rung Zuphpawng Gawknu kaw galaw la lu sai re.
Sinpraw Ginwang Ginjaw, Ginjaw Ginra, Laiza Muklum kata COVID-19 ana hte seng nna bungli galaw taw nga ai Komiti ni, Chek Point, Qurantine Dabang, tatut woi awn komiti ni kaw nna jahpawt daw bawngban dawdan la lu ai hpe shana maga hkying 2:30pm aten hta Laiza ginra kaw nga ai NGO, INGO, Makam Masham hpung, Ginjaw amyu shayi ni, CSO, JST ni hpe saw shaga let, KIC Ningbaw Malai Lat Du Daju Jum Sumlut Gun Maw kaw nna sanglang dan ai lam galaw ai re.
Zuhpawng hta KIO Ginjaw Covid-19 Ana Zinli Makawp Ninghkap Komiti kaw nna htuk tawn da ai tara ni hkan sa ra ai lam ni hpe Covid-19 ana makawp maga lam hta tatut woi awn galaw nga ai ni a bungli ni hpe grau htuk manu hkra galaw sa wa na lam hte seng nna bawngban ai re lam, COVID-19 Ana Zinli Makawp Ninghkap Komiti Amu Madu, Du Kaba Lahpai Hing Wawm tsun ai.
“Dai ni anhte na zuphpawng gaw COVID-19 bungli hte seng nna, bai maram dinglik ai zuphpawng re. Dai kaw gaw COVID-19 Komiti kaw na, htuk tawn da ai tara ni hkan sa ra ai lam ni dai kaw magup sumhpa grai law ai. Qurantine dabang, Chek Point bai nna, ta tut woi awn Komiti ni na bungli ni dai hta galaw manu wa hkra, htuk tawn da ai tara ni nlu hkan ai ni hpe grau manu ai hku na bai galaw ai lam re. Dai kaw anhte daw dan la lu ai lam gaw nkau mi anhte pat tawn da ai lam hpe bai hpaw ya ai Gaiwang ni loi mi shangwang kaji masat da ai hpe dam lada ai hku nna bai hpaw dat ai, nra ai nkau hpe bai shayawm kau ai re” nga nna tsun ai.
COVID-19 ana zinli langai hpe sha makawp maga ai hku nre sha, ya aten byin chye ai ana zinli ni hpe mung rau jawm makawp maga ra ai lam hte seng nna , KIO COVID-19 zuphpwng hta sa du shang lawm ai Saranum Labang Hkawn Ja (United For Health COVID-19 Resporns Group Kachin State kaw tatut woi awn galaw nga ai ) kaw nna shi a mu mada lam hpe ya na zawn tsun dan ai.
“Anhte ma ya gaw grau sa di maja ra ai ngu mu mada ai, hpa majaw nga yang ndai lamu marang gaw COVID-19 hpe grai n gun jaw ai shingra tara anhte kaw byin taw ai re majaw, htaning na ginhtawng ta kaw du hkra grai sadi maja ra na re, ga shadawn hkali ana hte gayau gaya rai byin nna kumla hpe nchye yu na hpe mung tsang ra ai re majaw, ana hpe makawp maga ai shaloi COVID-19 ana langai hpe makawp maga ai n re sha, kaga byin chye ai ana ni hpe mung rau jawm makawp maga ra na re ngu mu mada ai re, dai hpe ma yawng jawm sa di ga” nga nna tsun ai.
Ya aten COVID-19 ana zinli tinang a buga kaw nkap wa hkra jau tau makawp maga ra ai lam, hkum hkrang hpe gang gang nga ra ai lam, tinang hkum makawp maga ra ai sha n-ga manang wa hpe mung makawp maga ra ai lam, masha grai majaw ai shara hpe jen kau ra ai lam, ya aten COVID-19 ana zinli a majaw grai yak hkak nga ai mungshawa ni hpe lawan yu gawn lajang ra ai lam hte ana zinli makawp maga lam hte seng nna ladat shaw galaw sa wa ra ai lam ni hpe Saranum Labang Hkawn Ja kaw nna Hpaji jaw tsun da ai re.
Zuphpawng hta Bawngban la lu sai lawng lam ni hpe kaga uhpung uhpawng ni hte ta gindun galaw sa wa na lam, garum ningtum jaw ai wuhpung wuhpawng ni hpe ra ahkyak ai ten hta matut mahkai nna jawm galaw sa wa na hte jawng hpaw na lam hte seng nna hkyen shajin ai lam ni hpe matut galaw sa wa na re lam, COVID-19 Ana Zinli Makawp Ninghkap Komiti kaw na matut chye lu ai.
