Covid-19 ana hte seng nna hpaji jaw Mask garan ai lam galaw
Sinpraw Ginwang Ginjaw Covid-19 Ana Zinli Makawp Ninghkap Komiti ni woi awn nna, April shata 23 ya jahpawt hkying 8:00am aten kaw nna hkying 9:30pm aten du hkra Mai Ja Yang gat wang, lu sha seng ni hte lai wa lai sa masha ni hpe Mask jai lang ai ladat hte hkan sa ra ai lam ni hpaji jaw tsun dan nna, Mask n shakap ai masha ni hpe Mask garan ya ai lam galaw ai re hpe chye lu ai.
“Madung gaw mungchying mungshawa yawng Mask hpe jai lang nna hkamja lam hpe hkan sa lu na matu re. Shawng de gaw Audio Clip hte ndau ai lam ni, hpaji jaw ai lam ni grai galaw sai re majaw, ya gaw tatut bai galaw dan ai lam re” nga nna Sinpraw Ginwang Ginjaw Covid-19 Ana Zinli Makawp Ninghkap Komiti Amu Madu Hkamja Du Marip Brang Awng tsun ai.
Mai Ja Yang Muklum de du shang wa ai hkrun lam hkawm masha ni hpe Mai Ja Yang, Federal Law Academy Jawng shawng, Motel kaw nhtoi 14 ya quarantine tawn ai lam galaw ai hta, April shata 11 ya shani kaw nna April shata 23 ya shani du hkra rai yang quarantine masha yawng marai 29 du sai re.
Ya aten Mai Ja Yang quarantine masha ni hpe nhtoi hpring nna madi shadaw jaw ai lam grai nnga shi ai re. Nhtoi 14 ya hpring nna hkamja lam hkrak ai masha ni hpe gaw Ginjaw kaw na masat da ai hte maren, hkamja lam madi shadaw laika hta, ra rawng ai lam ni jahpring shatsup nhtawm, tinang dum nta kaw bat mi wa nga ra na lam ni hpaji jaw tsun dan nna, shanhte hpe wa kau shangun na matu hkyen da ai re lam, Hkamja Du Marip Brang Awng tsun ai.
Quarantine tawn ai shara hta masha law wa yang, nga shara mayak nga ai rai nna, ana lak lai lam nga wa yang mung lak san tawn na shara ni, sai jep gawk hte tsi tsi gawn lajang na arung arai ni ra ahkyak nga ai re lam chye lu ai.
