COVID-19 ana makawp maga arung arai ni hpe PCG kaw nna, Ginjaw COVID-19 Ana Zinli Makawp Ninghkap Komiti de sa ap ya
International Committee of the Red Cross (ICRC) kaw nna garum jaw ai COVID-19 ana makawp arung arai ni hpe, Peace-talk Creation Group (PCG) ni hku nna, December shata 15 ya shani KIO uphkang ginra, Mai Sak Pa Mare kaw Ginjaw COVID-19 Ana Zinli Makawp Ninghkap Komiti ni hpe sa du ap ya lu sai re.
ICRC kaw nna garum jaw dat ai arung arai ni gaw, tsi mawan hte ana zinli makawp maga ai hta sunglang na arung arai ni re. ICRC ni gaw hkrun lam mayak a majaw nlu sa du garum jaw ai raitim, PCG kaw nna gawng malai sa du ap ya ai hpe chye lu ai.
“Laiza de nga ai mungshawa ni hpang de du hkra sa garum mayu ai raitim, hkrunlam mayak a majaw nlu sa du ai re. COVID-19 hte seng ai tsi mawan ni ra wa yang mung shana la marit, mai byin ai daram garum na” nga nna ICRC kaw nna htet dat ai ga hpe PCG kaw na Sara Lamai Gum Ja tsun ai.
Garum madi shadaw la ai ICRC ni hpe mung, Ginjaw COVID-19 Ana Zinli Makawp Ninghkap Komiti Ningbaw Sara Kaba Sumlut Gam kaw nna mung kabu chyeju dum ai lam tsun ai, dai hpang shada hkapla lu sai hpe ta masat lakmat htu ai lam galaw ai.
ICRC kaw nna ya na zawn ana zinli makawp maga ai hta sunglang lu na matu arung arai ni hpe, 2020 ning laman hta numdaw lahkawng lang garum la sai hpe mung chye lu ai.
