Covid-19 ana makawp maga bungli hte seng nna bawngban hpawng galaw
KIO Ginjaw Covid-19 Ana Zinli Makawp Ninghkap Komiti ni woi awn nhtawm, KIO Ginjaw Covid-19 Ana Zinli Makawp Ninghkap Komiti Salang ni hte Sinpraw Ginwang Ginjaw Covid-19 Ana Zinli Makawp Ninghkap Komiti Salang ni May shata 25-26 ya shani Padang Hkrun Lam Majan Masing Woi Awn Rung Gawknu kaw hkrumzup bawngban hpawng galaw ai re.
Hpawng hta Quarantine Dabang, Check Point hte Tsi Rung shara hkan na bungli mabyin tang madun ai lam, hpawng hta sa du shang lawm ai Salang ni mung tinang ginra hta byin nga ai mabyin masa ni, shada ningmu jawm tang madun bawngban ai lam galaw ai re.
“KIO Uphkang ginra kata Ginjaw kaw nna woi awn galaw nga ai Covid-19 ana makawp maga bungli galaw sa wa ai lam hta shawng lam de myit hkrum myit ra hte galaw lu na matu, ra rawng ai lam, hprai mat ai lam nnga ai sha, grau na hkum tsup ai hte ana zinli nshang wa lu hkra makawp maga lu na matu yaw shada ai re” nga nna Ginjaw Covid-19 Ana Zinli Makawp Ninghkap Amu Madu Du Kaba Hing Wawm tsun ai.
Quarantine Dabang, Check Point hte Tsi Rung kaw bungli shang nga ai magam gun ni hte apnawng ramma ni hpe bungli matsun madun ai lam, masat masa galaw ai lam mahkra hpe Ginjaw kaw galaw ai hte maren, Ginwang Ginjaw shagu shawng lam de du hkra bung kre lu na matu jawm bawngban la lu sai re.
Bawngban hpawng hta KIC Ningbaw Malai Lat Du Daju Jum Sumlut Gun Maw kaw nna sa du hpaji jaw ai lam nga ai rai nna, hpawng hta KIO Ginjaw Covid-19 Ana Zinli Makawp Ninghkap Komiti Ningbaw Sara Kaba Sumlut Gam woi awn ai Komiti Salang ni, KIC Amu Madu Du Kaba Lahpai Zau Raw, Ginjaw Ginra Ginwang Ginjaw Covid-19 Ana Zinli Makawp Ninghkap Komiti Salang ni, Sinpraw Ginwang Ginjaw Covid-19 Ana Zinli Makawp Ninghkap Komiti Salang ni, Check Point 20, Quarantine Dabang 8 kaw na lit nga ai Salang ni, Laiza kaw nga ai CSO, INGO, JST hte HPA wuhpung wuhpung ni sa du shang lawm bawngban ai lam chye lu ai.
