COVID-19 ana makawp Myi man magap (Face Shield) galaw
Manmaw Ginwang, Ebbyu Buga Ramma ni hte Manmaw Volunteer Ramma ni pawng nna, tsi rung kaw hkamja lam a matu taut shakut nga ai magam gun tsi Sara/num ni hpe garum jaw lu na matu COVID-19 ana makawp Myi man magap (Face Shield) galaw ai lam na chye lu ai.
June shata 11 ya shani loi je kaw Positive byin ai masha nga wa ai majaw, tsi rung hkan jai lang lu na matu Face Shield galaw ai lam hte galaw shapraw la lu sai COVID-19 ana makawp arung arai Myi man magap ni hpe Manmaw tsi rung, Laiza tsi rung hte Mai Ja Yang tsi rung ni de garum jaw lu na matu re lam, Manmaw Robert Volunteer Group Hpa-awn Hpaujang Brang San tsun ai.
Ana Makawp maga Myi man magap garum jaw ai yaw shada lam hpe Hpaujang Brang San tsun ai hta “Yaw shada lam gaw hkamja lam a matu tatut shakut nga ai tsi magam gun Sara/num ni hpe dang di dang dep ai daram garum jaw lu ai marang e ana makawp maga lam langai lu la u ga matu garum jaw ai lam rai nga, shanhte ni machyi makaw hkrum wa jang mungshawa ni kaw grau hkra wa ai majaw dai hpe myit tau nna garum jaw ai re” nga nna tsun ai.
Ebbyu buga ginra kata hta Manmaw Robert Volunteer hpung ni hte Asuya ni ta gin dun nna, COVID-19 ana makawp maga tsi gat ai lam ni ding yang galaw nga ai re hpe mung chye lu ai.
