COVID-19 ana zinli a majaw, jahkring tawn da ai manau shadung hpe bai galaw shakre na matu hkyen lajang nga
COVID-19 ana zinli a majaw, shata (3) daram gan jahkring tawn da ai Manmaw Ginwang Htunghking Manau shadung hpe October shata kaw nna bai matut galaw shakre na matu hkyen lajang nga ai lam chye lu ai.
Ndai manau shadung gawgap ai hpe Manmaw Ginwang Htunghking Hte Laili Laika Hpung kaw nna woi awn galaw ai rai nna, Manau shadung hpe Manmaw deng (2), Aung Ta mare manau wang kaw lai wa sai 2020 ning, December shata kaw nna gawgap hpang ai re lam chye lu ai.
Manau shadung maka hpe ka shangut la na matu, October shata (13) ya jahpawt hkying 8:00am aten hta, Myitkyina Muklum kaw na manau shadung maka hte seng ai Sara Maike sa du nhtawm, Manmaw manau shadung gawgap komiti ni hte bawngban hpawng galaw ai hta, ndai manau shadung maka ka shakap ai hpe shata (3) daram galaw sa wa ra na re lam, Manau shadung gawgap komiti ni kaw na chye lu ai.
