Covid-19 Ana Zinli Makawp Ninghkap hte Mahkri Shawn Komiti Rung hpe hpaw ninghtan da
Panghkak Jau Ginwang Kahtawlik Nawku Hpung, Covid-19 Ana Zinli Makawp Ninghkap hte Mahkri Shawn Komiti Rung hpe May shata 22 ya shani Loije Hkahtawlik nawku jawng kaw hpaw ninghtan da lu sai lam na chye lu ai.
Komiti hpe Panghkak Jau Ginwang kata Loije Myo makau kaw na Hkahtawlik nawku hpung woi ni, ramma ni hte hpung kanu kawa ni jawm pawng nna hpaw ninghtan da ai re lam chye lu ai.
Mahkri Shawn Komiti Rung kaw nna ya aten yak hkak hkrum nga ai mungshawa ni a ra rawng ai lam hpe jahpring shatsup ya lu na matu shinggan de na garum lu ai wuhpung wuhpawng ni hte mahkri shawn let galaw sa wa na magam bungli hte seng nna, Panghkak Jau Ginwang Up Jau, Wa Jau Paul Lahpai Awng Dang tsun ai.
“Myen Uphkang ginra hte Shanglawt Uphkang ginra lahkawng lapran hta lockdown aten laman mungshawa ni grai yak hkak wa ai, wuhpung wuhpawng ni mung pru shang nna garum lu ai lam nnga ai re majaw, buga madu tai ai ni gaw gahkyin gumdin ai hte mungchying mungshawa ni a ra rawng ai hpe jahpring shatsup ya ai lam hta anhte hkrai ndang di lu ai, shinggan de na garum ni ra wa ai re, shinggan de na garum ni a matu tsap ya ai wuhpung wuhpawng nnga ai rai yang garum gahtau ni du wa lu na matu yak ai re majaw, mungshawa ni a ra rawng ai lam shagu hpe kaga lu garum ai wuhpung wuhpawng ni hte mahkri shawn nna galaw sa wa na matu yaw shada ai re” nga nna tsun ai.
Covid-19 ana zinli hpe ninghkap makawp maga lam galaw ai sha n-ga, kaga lam ni hpe mung mahkri shawn lu na matu nawku hpung kata kaw na komiti rung langai hku masat shagrin da sai rai nna, mungshawa ni a yaw shada ai kata kaw Covid-19 ana hte seng nna garum shing tau ai makawp maga bungli galaw na matu re lam, Wa Jau matut tsun ai kaw na chye lu ai.
Madung gaw buga kaw na ni hte ta gindun mat wa na rai nna, Asuyu kawn hpaw ninghtan da ai Covid-19 Ana Zinli Makawp Ninghkap Komiti ni a matsun kata rau ta gindun bawngban galaw sa wa na masing nga ai re hpe mung chye lu ai.
Covid-19 Ana Zinli Makawp Ninghkap Mahkri Shawn Komiti Rung hpe Prang Kadung, Ding Sing, Mai Ja Yang ginra ni hta mung hpaw ninghtan da lu sai lam chye lu ai.
