COVID-19 aten ladaw hta hkam ja lam hte htap htuk hkra laika sharin lu na matu jawng gawk kata arung arai naw ra kadawn nga
Putao Ginwang, Machyang Baw Ninghtawn, Nam Hkam mare lahta tsang jawng kaw COVID-19 ana zinli byin nga ai aten jawngma ni hpe hkamja lam hte htap htuk hkra laika hpaji sharin ya lu na matu jawng gawk kata arung arai ni naw ra kadawn nga ai lam na chye lu ai.
Madung ra kadawn ai arung arai ni gaw laika ka ku 50, dung lahkum 50 hte lata kashin shara ni ra kadawn nga ai lam buga masha langai tsun dan ai.
“Ana masa hta hkan nna jawng kaw shawng de gaw dung lahkum langai kaw marai 3/4 dai hku dung ai majaw masan sa ai raitim, ya gaw dai hku nmai dung sai dung lahkum langai kaw marai langai sha dung ra ai re majaw dung lahkum ni grai ra taw ai le yawng rai yang 50 ram ra nga ai” nga nna tsun ai.
Jawng lung ai aten hta Mungdan Asuya kaw nna masat jahkrat da ai tara hte maren jawngma langai hte langai pe 6 gang nna dung lu na matu, hkyen lajang da ai lam, jawng wang shang wa ai chyinghka lam kaw jawngma ni hpe hkamja lam jep chyoi ya na re hpe chye lu ai.
Nam Hkam Lahta Tsang Jawng kaw July shata 13 ya shani kaw nna jawngma mying jahpan hkap la hpang nga sai rai nna, July 20 ya shani kaw nna jawng lung hpang na re lam, COVID-19 ana zinli byin nga ai raitim, Nam Hkam lahta tsang jawng kaw jawngma nlaw ai re majaw jawngma shayawm kau ai lam nnga ai sha shawoi shaning na hte maren, hkapla na re lam chye lu ai.
