COVID-19 aten ladaw laman galaw lu galaw sha yak hkak wa ai majaw, lagut damya law wa na hpe ginra masha ni myit tsang nga

Hpakant ginra kaw COVID-19 aten ladaw hta galaw lu galaw sha lam, hkawm sa hkawm wa yak hkak wa ai majaw, mare kata lagut damya law wa na hpe ginra masha ni myit tsang nga ai lam na chye lu ai.

COVID-19 ana positive byin ai masha mung, lani hte lani grau law jat wa ai sha n-ga, galaw lu galaw sha hkawm sa hkawm wa yak hkak wa ai majaw, mare kata lagut damya grau law wa na hpe myit tsang nga ai rai nna, COVID-19 ana byin nga ai ten ladaw hta, nawku hpung shagu kaw nna mung, yak hkak hkrum nga ai tinang hpung masha ni hpe yu garum ai lam galaw yang kaja na re lam, Hpakant Lunghkang Buga hpung woi, Sara Hpaunat Brang Nan tsun ai.

Lunghkang mare kaw COVID-19 ana grau sawng wa ai majaw, ya aten Hpakant ginra hta mare kata hkawm sa hkawm wa ai lam hpe aten masat nna pru hkawm sa shangun ai sha n-ga, Lunghkang mare hta, COVID-19 ana positive mu ai lawk ni hpe pru shang ahkang pat da sai lam na chye lu ai.

Lunghkang mare kaw December shata praw 7 ya shani hta COVID-19 ana positive mu ai masha marai 10 bai jat wa ai rai nna, Hpakant ginra hta December shata laman sha, ana mu jep ai masha marai 100 daram du nga ai lam, COVID-19 ana kap hkrum ai machyi masha ni hpe gaw, Hpakant Ti Da Gu tsi rung wang kaw tsi tsi gawn lajang nga ai lam na chye lu ai.

Hpakant ginra hta COVID-19 ana positive grau law wa ai majaw, mare pru/shang lam hpe December shata praw kaw nna pat hkum da sai rai nna, gunrai htaw shalai ai Modo ni hpe mung, mare kata nshang shangun ai sha, shara masat nna htaw ginlen ai lam galaw nga ai re hpe na chye lu ai.

COVID-19 ana zinli a majaw, Hpakant ginra hta galaw lu galaw sha yak hkak wa ai majaw, COVID-19 ana byin ai aten ladaw grau na wa yang malu masha grau yak hkak wa nna mare kata lagu lagut manghkang ni byin wa na hpe ginra masha ni myit tsang nga ma ai re.

Photo Credit; Fb