COVID-19 hte seng nna ningmu jahpaw hkaw tsun hpawng galaw
Ginjaw Hpaji Dap hte COVID-19 Ana Zinli Makawp Ninghkap Komiti ni ta gin dun nna, COVID-19 ana makawp maga lam hte seng ai ningmu jahpaw hkaw tsun hpawng hpe July shata 23 ya shani Laiza Hotel Zuphpawng Gawknu kaw galaw ai lam chye lu ai.
Ningmu jahpaw hpawng hta COVID-19 Ana Zinli Ninghkap Komiti kata tatut woi awn komiti kaw na Dr. Bawk Wa hte Sara Wun Maran Naw San kaw nna COVID-19 hte seng nna byin pru wa ai labau kadun, ana makawp maga ladat hte seng nna jawngma ni hpe woi shaman na lam, lata kashin, tempreture shadawn ai lam ni, tatut jawng hta galaw sa wa na magam bungli ni hte seng nna tsun sang lang dan ai lam galaw ai re hpe chye lu ai.
“Sinpraw Ginwang Ginjaw, Dingda Ginwang Ginjaw, Ginjaw Ginra Ginwang Ginjaw kata Laiza Muklum kata na TOT sara/num ni hpe lata nhtawm sharin ya ai lam re, sharin hkamla ngut sai sara/num ni gaw tinang ginra buga de du wa ai shaloi, tinang a manaw manang ni jawngma ni hpe bai hti dan na matu yaw shada let hkaw tsun hpawng galaw ai re” nga nna Ginjaw Hpaji Dap Ningtau Amu Madu Admin Sara Kaba Lahpai Gam Maw tsun ai.
Hpaji jawng ni hta tatut hkrang shapraw galaw ai lam hta COVID-19 ana makawp maga arung arai ni ram ram yak hkak wa ai re, ya na zawn yak hkak ai lam hte seng nna mung NGO garum ningtum wuhpung wuhpawng ni hpe garum hpyi nhtawm jahkum shatsup galaw sa wa na lam, Sara Kaba matut tsun ai kaw na chye lu ai.
Hpawng lamang hta Ginjaw Ginra, Sinpraw Ginwang Ginjaw, Dingda Ginwang Ginjaw hte Mai Ja Yang Sara Hpaji Dakkasu jawng na sharin sara/num ni marai 38 sa du shang lawm ai lam chye lu ai.
