COVID-19 makawp ninghkap masing hpe ninghtoi bai htawt sit masat
COVID-19 Ana Zinli Makawp Ninghkap Komiti kaw nna COVID-19 ana zinli makawp ninghkap bungli masing hkrang shapraw sa wa na hte tara ni hpe dingyang hkan sa shatup na matu, ana makawp ninghkap masing hpe June shata 30 ya shani du hkra ninghtoi bai htawt sit masat dat sai lam, June shata 12 ya shani ndau shana da ai re hpe chye lu ai.
Ginjaw COVID-19 Ana Zinli Makawp Ninghkap Komiti kaw nna matsun shapraw da ai ana zinli makawp tara ni hpe hkan sa shatup na matu, June shata 15 ya shani du hkra nhtoi masat da ai lam nga ai raitim, June shata 10 ya shani na Ginjaw Komiti zuphpawng hta bai dawdan la lu sai hte maren, COVID-19 ana makawp ninghkap masing hpe June shata 30 ya shani du hkra bai jat masat dat ai re hpe chye lu ai.
KIO uphkang Ginwang kata na mungchying mung shawa hte magam gun ni yawng hpe chye na hkawn hkrang hkra tsun hpaji jaw sa wa ra na lam, lawu tsang komiti ni mung bungli ni hpe matut galaw sa wa na hte masat jahkrat tawn da ai tara ni hpe shawng na hta grau shakut shaja atsam shapraw sa wa ra na lam, ndau shana laika hta tsun da ai.
KIO uphkang ginra kata na hkamja lam jep joi dabang ni hta June shata 12 ya shani du hkra hkamja lam maram masam hkam la nga ai masha yawng marai 200 nga ai re hpe mung chye lu ai.
