CRC Day 30 Year, Ma ahkaw ahkang masat ninghtoi hpawng lamang galaw
Convention on the Rights of the Child (CRC) Ma ahkaw ahkang masat 30 ning hpring hpawng lamang hpe, November shata 20 ya jahpawt 9:00am aten kawn shana daw hkying 3:30pm aten du hkra, Laiza Muklum, Sinpraw Majoi Manau Wang hta galaw ai lam chye lu ai.
Ndai hpawng lamang hpe Ginjaw Hpaji Dap ni woi awn nhtawm, hkrat ang ai ja gumhpraw hpe Ginjaw Hpaji Dap hte hpaji lam hta garum ningtum ya ai, Myanmar Education Consortium (MEC) ni pawng nna galaw ai lam chye lu ai.
Hpawng lamang galaw ai a yaw shada lam hpe Sara Kaba Hpunhpyen Zau Hkyen (Ginjaw Hpaji Dap Ningtau Amu Madu: NGOs) kaw nna ya na zawn tsun ai.
“Anhte gaw Ma ni a ahkaw ahkang hpe kaja wa tatut chye na hkawn hkrang nna, kaja wa jai lang na, kaja wa akyu jashawn nhtawm, Ma ni hta akyu hkamsha, kanu kawa ni chye na na matu, tatut jai lang na matu galaw ai, CRC Day hta Ma ni a matu galaw ya na lit nga ai asuya, mungshawa kanu kawa magam gun ni yawng hkra, Ma ni a lam hte seng nna sa bawngban ningmu jahpaw karan kachyan mahkri shawn hkau chyap wa na matu re” nga nna tsun ai.
Saranum Kaba Nhkum Hkawn Ra (Ginjaw Amyu Shayi, ECCD lithkam) kaw nna Ma ahkaw ahkang hte hpaji lam hte seng nna, laksan special talk hku tsu dan ai lam galaw ai.
Lamang hta CRC Day a matu jawngma ni hte sara/num hkrang shala dan ai lam, hpyen yen Ma ni a kraw hkrat kaw na soi tawn da ai sumla hte Ma ni hpe bawng ring lam galaw ya ai sumla ni madun tawn ai lam galaw ai.
Ndai CRC Day lamang hpe Laiza Muklum hta shawng ningnan lang galaw ai rai nna, du wa na shaning hta mung matut galaw sa wa re lam, hpawng lamang hta Ma hte seng ai wuhpung wuhpawng ni, mungchying kanu kawa ni hte Ma ni yawng marai 2300 daram shang lawm ai rai nna, jawngma ni hte Sara/num ni hku nna manau nau ai lamang hte ginchyum dat ai hpe chye lu ai.
