Da Sai gumshem Myen hpyen dap hpe KIA ni padang dip zingla
KIA Masat (3) Dap Ba, Masat (15) Dap Dung ginra, Da Sai kaw dap jung nga ai gumshem Myen hpyen dap Hk.L.Y (237) dap hpe, March shata 14 ya shani KIA pawng hpawm hpyen hpung ni padang dip zingla lu ai lam chye lu ai.
Dai hpawt hkying 6:00am aten kaw na htim gasat ai hpang hkying 8:00am aten daram hta hpyen dap hpe zepzi lu zing la sai, hpyen lang arung arai ni hpe mung padang dip la lu ai lam, lit nga ai salang ni tsun ai.
Gasat poi laja lana byin ai hpang, dai shara kaw Jet nbung li hte Y-12 nbung li kaw nna bawm jahkrat bun ai lam chye lu ai.
March shata 14 ya shani hta sha, KIA Masat (1) Dap Ba ginra rai nga ai, Sumpra Bum kaw dap jung shara jahkrat nga ai Hk.L.Y (46) gumshem Myen hpyen dap hpe dai ni shani ka-ang hkying 12:45pm aten kaw na KIA pawng hpawm hpyen hpung ni sa htim gasat ai lam, shawng lam shiga lawk kaw na chye lu ai.
KIO ginjaw ginra, Manmaw, Laiza hte Myitkyina modo lam makau grup yin shara ni hta dap jung nga ai gumshem Myen hpyen dap hpe KIA, AA hte pawng hpawm hpyen hpung ni 2024 ning, March shata praw 7 ya shani kaw nna htim gasat ai hta dap shara law law hpe padang dip zing la lu sai raitim, nkau shara naw nga ai majaw, hpyen masa shaja hkat nga ding yang rai nna, gumshem Myen hpyen dap ni gaw, Y-12 nbungli hte Jet Fighter nbungli kaw nna bawm jahkring hkring wa jahkrat gasat nga ai re.
