Dabak Hka kaw Ja htu sha nga ai ni hpe ja nhtu na hku hpyen yen kaw na bai nhtang wa nga ai, mung masha ni ninghkap
Dabak hka kaw Ja htu sha nga ai masha ni hpe hpyen yen camp na bai nhtang wa ai mungmasha ni gaw, ja nhtu na matu ninghkap nga ai lam, Ga Ra Yang mare na lit nga ai salang langai tsun ai kaw na chye lu ai.
“Dabak hka kaw Ja htu ai majaw hka hten ai, hka maza mat ai, dai hka hpe shat maw shat mai hkai nmai kaw jai lang ai, grau nna gaw lu hka hku jai lang taw ai, dai hka hpe machyu nna hkawm sa hkawm wa, gunrai htaw sa htaw wa re ai ni mahkra gaw, jamjau wa ai” nga nna, Ga Ra Yang mare na hka shi hka nu makawp maga komiti hpa-awn tsun ai.
Grau nna Ja htu ai kaw na tsang ra ai gaw hka ni hten mat na, Ja htu ai kaw lang ai pada a majaw, hka kata kaw gung tai ai hka hpe anhte nmai ja lu mat ai, mare de nlu wa shi ai hpyen yen mungmasha ni a mare hpe makawp maga ya ai, ndai Dabak hka gaw anhte a asak hte bung ai ndai kaw sha machyu nga ai re majaw, hka hpe jahten shaza ai lam ni, Ja hte seng ai hpe grau nna hkum pat nga ai re lam, salang wa matut tsun ai.
Dabak hka mayan hta Ja htu ai hta jak kaba gawng galang jak (2) hte htu rai nna, kawa wawn hte hka hpunglip nna htu ai jak kaji (50) jan hte htu sha nga ai lam chye lu ai.
Dabak hka hpe jai lang taw ai mare ni gaw, Dabak Yang, Katsu Yang, Ga Ra Yang, lawu ga de gaw mare kahtawng (30) hte hka hku de gaw mare gahtawng (54) daram machyu na nga ai rai nna, Mare kahtawng nkau mi gaw mayak amyu myu a majaw, hpyen yen camp na nlu wa shi ai lam chye lu ai.
Ya ten hta hpyen yen camp kaw nna mare buga de bai nhtang wa ai nta htinggaw ni gaw, Dabak Yang mare kaw nta nnan lu sai htinggaw 200 jan, Katsu Yang mare hta htinggaw 50 jan, Ga Ra Yang mare hta htinggaw 150 jan hte hpyen yen n yen ai ni hte rai yang, htinggaw yawng 700 daram du taw nga sai lam chye lu ai.
Lai wa sai 2011 ning June shata kaw nna, gumshem Myen hpyen dap hte KIA ni numdaw kalang bai gasat gala majan byin wa ai majaw, Dabak, Hkatsu hte Ga Ra Yang mare hkan na mungshawa masha ni gaw, KIO uphkang ginra hte Myen asuya ni uphpang ai ginra de, hpyen koi yen machyu nga ai hpe mung chye lu ai.
