Dabak mare masha ni, tinang mare buga de bai nhtang wa lu na matu mying jahpan hta kahkyin nga
Photo Credit; fb
KBC Ginjaw kaw nna woi awn let, Sama Ginwang, Dabak buga hpung mare masha ni, tinang mare buga de bai nhtang wa lu na hte, seng ang ai asuya lahkawng maga de tang madun lu na matu mying jahpan hta kahkyin nga ai lam na chye lu ai.
“Tinang buga nta de bai wa na lam hte seng nna gaw, buga de wa na myit ai ni mung shanhte nan hkut hkut nai nai myit hkawn hkrang ai lam ni nga ra ai, garai nwa na myit ai rai yang mung mai ai, wa mayu ai ni hpe chyawm gaw, zin lum la na, seng ang ai asuya lahkawng maga de jahkrup la rai nna, anhte masha ni a matu mai byin ai daram tinang a mare buga de lawan lu wa hkra hkyen lajang wa na re” nga nna Sama Ginwang bawng ring hpa-awn Lahpai Lat Awng San tsun ai.
Nta buga de wa na lam hte seng nna, Ninggam ni grai naw hkyen lajang ra ai. Buga masha ni hpe ma, nwa nmai nre ai sha, wa mayu ai rai yang jahpan jaw marit ngu ai hku nna, jahpan ni hpe hta kahkyin nga ai aten naw re hte seng ang ai asuya lahkawng maga de htinggaw kade wa na ngu ai jahpan tang madun na hkyen nga ai re majaw, ya jang jang wa na masing gaw nnga shi ai re hpe mung matut chye lu ai.
Photo Credit; fb
Lai wa sai shawng daw de mung, Dabak mare masha htinggaw 30 jan tinang nta buga de wa mayu ai lam tang madun da sai rai nhtawm Myen mung asuya ni kawn ginra jasan jaseng ai lam, hkala nba nhkrum na matu bawm tam jasan ai lam ni mung nga sai re.
Dabak mare buga hta htinggaw 247 daram nga ai rai nna ya aten hta Myitkyina, Waimaw hte jarit mayan hpyen yen camp ni hta shanu nga ai re.
“Shimlum lam a matu gaw, seng ang ai asuya ni kawn bawm hte seng nna jasan jaseng ya na matu hpyi shawn da ai lam ni nga ai, bai nna ni nawn ai hpyen dap ni kaw nna mung tam jasan sai nga ai shiga mung na lu ai raitim kade daram shimlum lam lu na ngu hpe gaw anhte naw sagawn ra na re’ nga nna buga masha ni tsun dan ai kaw nna chye lu ai.
